– Ein perfekt hage. Skulle ønskje han var min, sa ein av artistane frå scena under konserten i Moahagen i går kveld. Og publikum storkosa seg.

Me såg det første gong under den store speidarleiren for eit par år sidan, endå meir under Håkonarspelet i haust og etter konserten i går kveld er me ikkje lenger i tvil: Moahagen er ein suveren arena for utekonsertar og andre spennande utearrangement sommarstid. Ein stor blom til alle som har lagt alt til rette for at arenaen no framstår slik han gjer. Berre synd at ikkje fleire enn rundt 300 fekk med seg gårsdagens utearrangement, i supert sommarvêr.

For stemninga var upåklageleg heilt i frå starten.

Young Dreams var først ute med melodiøs, velklingande pop – og med det trøkket som skal til. Ein musikk som gjekk rett inn hos dei aller fleste. Imponert vart me både over instrumental- og vokalprestasjonane. Samstundes var dei ein artig gjeng som kommuniserte utruleg bra med publikum.

Det gjorde òg Casiokids med ei musikkform som nok spelar litt på namnet deira, med elektropop krydra med spennande synth-effektar og diskorytmar. Flott vokal var det her òg. Spesielt likte me dei fleirstemte falsett-vokal-partia.

Mange venta på Susanne Sundfør. Og ho skuffa nok ikkje fansen, sjølv om ho sleit litt med lyden i starten. Sundfør sin musikk er spesiell og utruleg krevjande med syltette, dissonnerande klangar der svært lite avvik frå tonane skal til før det blir surt. Susanne Sundfør og koristane hennar meistra dette utruleg bra, like elegant som når ein skiflygar tar eit fjørlett telemarknedslag etter å ha hoppa 240 meter. Svært imponerande. Så får me heller bere noko over med at ho er så lite pressevenleg at ho ikkje vil gi ein einaste liten kommentar «utan at me har snakka med managementet hennar på førehand», som ho sa då me ønskte å stille ho eit enkelt spørsmål. Ståande applaus frå fansen fekk ho i alle fall.

Alt i alt ei flott stund i Moahagen. Alle ære til Lene Tufteland og gjengen hennar som fekk dette i stand. Publikumstalet var nok litt skuffande, men det er likevel å vone at det ikkje vert lenge til neste konsert på denne fantastiske arenaen.