Håvard Helland smiler lurt etter å ha henta heim den store pokalen i Vikedal. Foto: Kjetil Rydland.

Gårsdagens sesongopning på motorbanen i Vikedal gav varierande utbyte for fartsfantoma frå Fitjar, men Håvard Helland viste solid køyring og gjekk heilt til topps i den største klassen i rallycross.

Dermed ar fjorårsvinnaren teke første stikk i kampen om vestlandsmeisterskapet i år. Håvard hadde ein litt treg start, og måtte bryta første innleiingsheatet. Men etter kvart gjekk det mykje betre, han vann heat nummer to og blei nummer tre i neste heat.

I finalen var han ikkje til å stoppa, og freste inn til førsteplass i «vestringklassen», med motor over 2,4 ccm. Der skulle han gjerne hatt selskap av teamkollega Oliver André Matre, som debuterer i rallycross i år.

Men Oliver fekk ikkje start på volvoen sin i første heatet etter problem med ei dyse. Han fekk med seg treninga i går, men så var det heilt slutt. Dermed blei det eit magert utbyte for bobleelskaren i Vikedal denne gongen. No får Oliver det travelt med å finna ut av feilen før neste runde i vestlandsmeisterskapet.

Håvard Helland på toppen av sigerspallen i Vikedal, saman med Michael Jensen (2) og Karoline Breivik (3). Foto: Privat.

Også i bilcross blei det mykje blanda drops for Fitjar Racing Team denne gongen. Men Ole Lønning seier seg godt fornøgd med dagen. Han køyrde inn til tredjeplass i alle tre innleiingsheata, og i B-finalen blei det fjerdeplass.

Det gav 9.-plass totalt, noko Ole er godt fornøgd med. Han fortel at bilen hans, ein Volvo 145, fungerte fint, og han ser optimistisk på sesongen.

Thea Vaagen Matre stilte òg opp i bilcross. Ho ser ut til å vera ein lovande førar, men denne gongen utmerkte ho seg mest med å køyra sisterunden på tre hjul! Det er godt gjort.

Neste løp i vestlandsmeisterskapet er i Egersund 19. mai. Me vonar alle hjul og dyser er på plass til dess, og ønskjer førarane våre lukke til vidare.

Ole Lønning var godt fornøgd med pokal for 9.-plass totalt i juniorklassen. Foto: Privat.