Kristian Prestbø i aksjon på Sotra ved eit tidlegare høve. Foto. Helga Rimmereid.

– Super innsats av vår egen Kristian Prestbø, som kom på 3.-plass i Hordablæsten i dag, melder Fitjar Skulekorps på Facebook-sida si.

Under Hordalblæsten i Grieghallen i Bergen denne helga stilte Kristian Prestbø opp i klassen for musikantar fødde i 2000. Her blei han nummer 3 med tubaen sin, i skarp konkurranse med 17 andre blåsarar i klassen.

Stykket han framførte denne gongen heiter «3 miniatures» og er skrive av Anthony Plog. Rundt tre månader har Kristian arbeidd med dette stykket, fortel han.

Kristian Prestbø går på Kongshaug Musikkgymnas, der han er ferdig til våren. Han reknar med å driva med utøvande musikk på heiltid etter vidaregånde skule.

Til hausten begynner han på bachelor i utøvande musikk, på tuba. Etter det me forstår, har han kome inn fleire stader, men han har ikkje heilt bestemt seg for kor det blir enno.

Fitjar Skulekorps melder på heimesida si at dei er utruleg stolte av han. Det er me òg. Vel blåst!

«Hordablæsten» er ein av dei største musikkonkurransane for korps, ensemble og solistar i Noreg, og hadde i år rekordmange deltakande korps.

70 korps med totalt 1585 musikantar, 314 solistar, 104 ensemble med totalt 429 deltakarar, og 239 aspirantar, frå heile Hordaland, var samla i Grieghallen laurdag og søndag 23.–24. mars.

- Annonse -

Her var det konkurransar for juniorkorps, generasjonskorps, ensemble og solister, for janitsjar og brass i 1., 2. og 3. divisjon, og eit aspirantseminar som samla heile 239 unge musikantar.

Det var ingen korps frå Stordøya med denne gongen.