– Over 200 deltakarar mellom 30 og 85 år, frå 17 land, inndelt i fem klassar, deltok under Sprint-VM for veteranar i Berlin. To lokale veteranar, Onar Westerheim og Jan Henriksen, gjorde ein heiderleg innsats, opplyser Elise Aarbø til fitjarposten.no – Onar deltok i M 60-65 saman med 22 andre. Samanlagt vart han beste løpar frå Noreg med ein 8. plass. Eit uhell på 500m første dag gjorde at han tapte to-tre plassar samanlagt.

Jan Henriksen frå Stord deltok for første gong i VM og gjorde sine saker bra. Samanlagt vart han nr. 9 i ein klasse med 30 deltakarar, fortel Aarbø, som fortel at desse konkurransane vert meir og meir populære og hardare for kvart år. Fleire gamle heltar dukkar opp.

– Ramma rundt meisterskapen er flott med mottaking og bankett med stor festivitas. Gamle kjende møtest og utvekslar alt frå rundetider, feilskjer, kneskjelv, treningsformer og planar for nye ”bragder”. Kjekt å høyra at 70-80-åringar planlegg, ser framover og drøymer om betre teknikk og rundetider. Alt i alt ei stor oppleving, seier ei engasjert Elise Aarbø til slutt.