Ingrid Tveita, heilt til venstre, fekk ein god start på sin 60 meter.

Friidretssgruppa i Stord idrettslag inviterte til  hallstemne på Vikahaugane på laurdag, og 10 unge friidrettsutøverar frå Fitjar var med og konkurrerte.

I Sunnhordland i dag kunne me lesa om Ådne Vik som persa seg i høgde med 1,16, og som med det var svært nøgd med stemnet. Nøgde var og alle dei andre 9 deltakarane frå Fitjar, og mange kunne syna til flotte resultat, nye personlege rekordar, stor innsats og stor friidrettsglede på kvar sitt nivå.

Andre idrettslag som var representert på stemnet var Stord, Haugesund og Torvastad.

Den yngste deltakaren frå bygda vår var 7-åringen Tor Håkon Aarbø som deltok i klassen rekrutt. Han var med både på lengde med tilløp og 60 meter, og til liks med alle dei andre deltakarane frå 11 år og nedover fekk han deltakarmedalje etter endt stemne. Ein gullmedalje i snor til å henga rundt halsen, og som han stolt synte fram.

Den eldste deltakaren frå Fitjar var storebror til Tor Håkon: Sindre Aarbø, som stilte i 13-årsklassen og som leverte ein flott 60 meter der han tiil slutt enda på 4. plass.

I tillegg til Ådne, Tor Håkon og Sindre var og gutane Andreas Vik, Markus K. Vik og Ole Rimmereid på plass for å forsvara den grøne Fitjar-fargen, og dei representerte alle Fitjar på ein framragande måte.

Fitjar har ein sterk kulekastaren i 11-årige Guro Rimmereid som utklassa dei andre i sin klasse med eit støyt på heile 6,82 m.

Tone Brakedal utklassa og konkurrentane i fleire øvingar. Ho vann overlegent med 3,46 m i lengde med tilløp og 9,79 sekund på 60  meter. Likevel var kanskje trenar Bård Inge Bøe aller mest nøgd med at ho var den første jenta i 11-årsklassen som kom over 1,16 i høgde med tilløp, og med det vann denne øvinga og.

Marte Rimmereid likar seg godt i lengdegropa, og med ein førsteplass her og med ein 3. plass på 60 meter var ho godt nøgd med sitt første stemne. Det var og Ingrid Tveita som deltok både på 60 meter, lengde med tilløp og kula.

Ingrid Tveita, heilt til venstre, fekk ein god start på sin 60 meter.

Sjølv om det vart ein del venting, likte ungane seg på stemnet, og det gav endå større motivasjon til vidare trening. Neste trening i friidrettsgruppa, for dei som går i 4. klasse eller er eldre, er tysdag ettermiddag kl. 17.00 i idrettshallen i Fitjar kultur- og idrettsbygg. Då set nok trenarane Tom Rydland, Bård Inge Bøe og Rolf Vik pris på alle som kjem og vil trena friidrett saman med dei, både «gamle traverar» og «nye utøverar».

Tone Brakedal og Marte Rimmereid var godt nøgde med stemnet.
Tone Brakedal og Marte Rimmereid var godt nøgde med stemnet.