Johannes Sandvik Bø på toppen av sigerspallen i Haugesund. Foto: Privat.

Lettbeinte fitjarungdommar har gjort seg sterkt gjeldande under dagens øvingar i Gassco-lekene i Haugesund, og som vanleg var Johannes Sandvik Bø i aller fremste rekkje.

Fjortenåringen Johannes fekk fin matching på 800 meter denne gongen i eit felt med to år eldre utøvarar. På dei siste 200 metrane drog han kontrollert ifrå, og vann med fem sekunds margin. Tida 2.06,90 er pers med rundt 1,1 sekund, og bringar Johannes opp att på andreplass på årsrankinga i Noreg for årsklassen.

Marius Pedersen var like suveren på sin 600 meter. Han drog heile vegen i delvis motvind i Haugesund i dag, og kom i mål på solide 1.36,3. Tida er berre to tidelar bak den personlege rekorden til den spreke trettenåringen.

Marius Torbjørnsen (17) viste stabilitet og solide konkurransenervar i høgde ved å gå over 1,75 i tredje forsøk. Dette er tangering av den personlege rekorden han og gav 1.-plass!

Maren Rydland gjorde også sine saker bra på 600 ved å springe inn til 2.-plass i klassen jenter 12 år på tida 1.56, som er pers med tre sekund. Med litt meir spesialtrening får ho nytte av sine lange elegante klyv, og vil ganske sikkert pressa den tida solid lenger ned i tida som kjem.

Tori Torbjørnsen (11) vann både lengde og 60 meter. Ho var nok aller mest nøgd med den nye persen i lengde på 3,51.

Også Fitjar sitt potensielle løpsfantom Ole Jakob Wiik (10) dokumentere fin form då han suste inn til ny pers og andreplass på 60 meter med 9,64, berre tre hundredelar bak vinnaren. I morgon spring han 600 meter, og han har truleg skumle planar om ein minst like sterk prestasjon på den distansen.

Maren Rydland på pallen i Haugesund. Foto: Privat.