Fire spelarar frå Fitjar IL badmintongruppa fekk prøvd seg i Strilaslaget 2012 i Bildøyhallen på Sotra.

– Fitjar IL badmintongruppa har hatt aktive spelarar i litt over eit halvt år. Me har to treninger i veka og spelarane har hatt jamn framgang sidan oppstart i september 2011. For å sjå kva me var gode for var me med på turnering for første gong. Som alltid klaffa det ik kje for alle, men fire spelarar fekk prøvd seg i både singelkampar og doublekampar under Strilaslaget 2012 i Bildøyhallen på Sotra, fortel Håkon Rydland Sæbø til fitjarposten.no.

Både Thomas Olsen Korneliussen og Theodor Larsen stilte i HSU17A med kampar laurdag 24.03. Dei møtte erfarne motstandarar som hadde eit snitt på 10 turneringar i året i Bergen. At Theodor klarte å spela sitt spel mot Håkon Johannessen, i alle fall i første sett, var difor gøy å sjå på. Me får gje Theodor og Thomas ein sommar og haust til med trening, så tenkjer eg det ser annleis ut på neste turnering.

Seinare på dagen var det double. Thomas spelte saman med Håkon Johannessen og Theodor saman med Håvard Haugen. Begge vann to kampar i puljen, og i kampen mellom dei to var det Theodor og Håvard Haugen som vann. Theodor kunne difor reise heim med vel fortent 1.premie i HDU17B. Thomas vart ein god nummer to, og fekk vist meir av kva som bur i han under doublekampane enn under singelkampen han hadde tidlegare på dagen.

Søndag 25.03. var det Marie Oma og Åse Meling Underhaug som skulle til pers. Dei møtte erfarne spelarar med mange turneringar på samvitet. Likevel var det ikkje mykje nervøsitet ute og gjekk. Av resultatlista kan de sjå at Marie følgde Jannicke Soltvedt til 18 av 21 i første sett, og at Åse fekk vist litt av sitt spel, spesielt i kampen mot Soltvedt. Emma Franck Gwinnel var det ikkje mykje å gjere med.

Same dag var det òg sett opp mix double for Marie og Åse. Artig at dei fekk same partnarane som Thomas og Theodor hadde dagen før. Det var veldig nytt for dei begge å spele mix double, men etter eit sett og to forstod begge korleis spelet fungerte. Mix double var likevel først og fremst ei prøve på korleis ein spelar mix double.

– Alt i alt var det to innhaldsrike dagar med mange kampar på kvar. At dei var stive og støle nokre dagar etterpå er ikkje rart. Til vanleg er det nok med ein kamp eller to. På turnering kan ein ha seks-sju kampar på ein dag. Fitjarspelarane var alle ved godt mot då me reiste heim. Turneringa viste oss at me må trena meir uthald og fotarbeid framover. Då er godt å ha trenarar frå Stord med på måndagane frå 1930 til 2030.

Me held nok på ut april. Er det nokon som har lyst å prøve, må de berre komme innom. Me har racketar de kan låne dei fyrste gongene, seier Håkon Rydland Sæbø til slutt.