Elin Bjørke Rasmussen, Gunn Litlabø, Gro Kyvik og Kari Eikeland prisar Fitjarfjellet, medan Kidno og Litlasåto vinkar i det fjerne. Foto: Kjetil Rydland.

Dei var frå seg av begeistring, dei fire godt vaksne stordajentene me møtte ovanfor Vandredalsheia i går ettermiddag.

Dei hadde teke seg ein pust i bakken i det fine turvêret, og tok seg tid til å beundra den vakre naturen vår, då dei augna ein journalist i fjellheimen.

Det var lokalkjende Gro Kyvik som hadde lokka med seg dei tre andre, litt tilårskomne veninnene på tur i nabokommunen. Og dei angra ikkje.

Det einaste dei klaga over, var at det var for få stordabuar, og altfor få dyr:

– Her burde vore fullt av sauer, geiter og ungdyr, meinte Elin Bjørke Rasmussen.

No ønskjer dei å gjera sitt for at stordabuen skal få augo opp for den vakre fjellheimen i Fitjar. Alle fire anbefaler Fitjarfjellet på det varmaste:

– Kom til Fitjar! smiler dei, og røper at dei ikkje er særleg entusiastiske over vindmøllene.

Men på rundturen frå Dalshaigane, langs Tveitaelva over Vandredalsheia til Botnavatnet og vidare til utløpet av Klovskarvatnet før du går ned att til Dalshaugane, verken ser eller høyrer du vindmøller.

- Annonse -

Til stordabuar og andre som lurer: Dalshaugane ligg på høgda rett nord for Tveitaelva, eit par kilometer nord for vegkrysset på Rydland. Her er det kart og fleire gode, vindmøllefrie turforslag for liten og stor.

Dei fire damene kom frå Dalshaugane, og fekk knapt sjå vindmøllene våre, noko dei heller ikkje sakna. Foto: Kjetil Rydland.
Damene hadde tenkt å kryssa Tveitaelva rett nedanfor Botnavatnet. Foto: Kjetil Rydland.
Ved parkeringsplassen på Dalshaugane kan stordabuar og andre orientera seg om fleire fine turar i Fitjarfjellet. Foto: Kjetil Rydland.