Fitjardalten blir avvikla førstkomande søndag, for 30. gong, etter oppstarten i 1982.

Deltaking i store mosjonsløp var populært på 80-talet, og var såleis «i tida» då turgruppa i Fitjar Idrettslag starta opp dette løpet i 1982. Og dei fekk ein flying start, med heile 378 deltakarar på startstreken. Av desse stilte 60 i konkurranseklassen, 82 i trimklassen og resten i tur-/mosjonsklassen. Vinnar i seniorklassen for herrar blei fitjarbuen Håkon Vestbøstad, medan junioren Lars Ove Strømø hadde best tid av alle. Turid Iversen frå Huftar vann dameklassen.

Om interessa var stor første året, blei ho endå meir overveldande året etter, då heile 530 deltakarar stilte opp. Bladet «Sunnhordland» kalte løpet for «Folkedalten» og skreiv onsdag 12. oktober 1983: «Me vil tru at Vårherre ser med stor forståing og velvilje på masseidrotten. For trass i dei dystraste spådomar frå vêrprofetane si side, vart Fitjardalten 1983 signa med eit makelaust haustvêr med sol og ideell temperatur. … Me kunne ikkje finna noko å setja fingeren på og kan berre slå fast at Folkedalten vart ein suksess på alle vis».

Opp gjennom åra har mange gode løparar vore med i Fitjardalten; dei mest kjende er nok desse: OL-løparen Lars Ove Strømø frå Stord vann den første Fitjardalten som junior. Håkon Vestbøstad har fleire gode plasseringar i NM på 800 og 1500 meter. Rolf Vestre, landslagsløpar i orientering, med blant anna VM-sølv i stafett. Ein annan som har vore med å setja sitt preg på Fitjardalten med mange løpssigrar, er stordabuen Nils Hetleflåt. Andre som har vore med og sett sitt preg på Fitjardalten er Haugesunds-damene Bodil Melkevik og Astrid Dahle, og BFG Fana-løparane Bjørn Tore Taranger og Kjell Raa. Løyperekordane tilhøyrer Tommy Laitinen frå Stord, med 29.18, og Miriam Berg Hovda frå Haugesund, med 33.11. 

Utover heile 1980-talet heldt deltakartalet seg på god over 400, men gjekk noko ned utover på 1990-talet. På 2000-talet har deltakartalet vore godt under 100, men i fjor stilte heile 156 deltakarar, som er rekord i dette tusenåret.

Årets løp startar frå Fitjar Idrettspark søndag 9. oktober kl. 13.00. Nærmare opplysningar om påmelding, startkontingent m.v. kan du lesa på nettsida til Fitjar Idrettslag: