Heile 156 deltakar stilte til start i Fitjardalten i det vakre haustvêret søndag; det er det høgaste deltakartalet sidan tusenårsskiftet. Som vanleg var det flest deltakar i turklassen, og som vanleg nytta enkelte av desse høvet til å gå eit par æresrundar inne på stadion, slik at dei fekk godkjent løpet som 10 km til idrettsmerket.

Minidalten samla 27 deltakarar under 12 år. Dei starta på løpebanen og sprang ein tur bort i byggjefeltet i Bakkjen og kom tilbake til mål etter eit løp på ein liten kilometer. I denne klassen er det berre vinnarar, og kvar enkelt fekk utdelt sin gullmedalje etter løpet.

I konkurranseklassen stilte heile 50 deltakarar; det høgaste talet på mange år. I fråvær av andre store kanonar i kvinneklassen, fekk den gamle kjenningen frå Haugesund, Bodil Melkevik, lett spel denne gongen. Andre- og tredjeplassen gjekk til utøvarar frå Fitjar, Turid Marie Lambach Fitjar og Anne Helene S. Vestbøstad, men begge med god avstand til vinnaren.

Herreklassen blei noko meir spanande. Idar Helland la ut i eit mordarisk tempo, som indikerte at han ikkje hadde tenkt å la seg truga av nokon. På veg ut «Maratonporten» etter 300 meter hadde han allereie fått ei leiing på 30 meter til nr. 2, Kjell Raa frå BFG Fana. Etter kvart fekk Helland det litt tyngre, og han blei teken att av Fana-løparen. Frå Vestbøstad og til Rimbareid heldt dei to følgje, men då dei kom forbi prestagarden nedover mot kyrkja, hadde Raa fått eit klårt forsprang. Dette hadde han ingen problem med å halda heilt inn til mål. Tredjeplassen gjekk til Bård Inge Bø frå Stord IL, bak nemnde Idar Helland.

Her er dei beste i kvar klasse; komplett resultatliste kjem ikkje før arrangøren har fått summa seg.

Damer:

1. Bodil Melkevik, Haugesund IL              41.42
2. Turid Marie Lambach Fitjar, Fitjar IL      44.38
3. Anne Helene S. Vestbøstad, Fitjar IL     45.06

Herrar:
1. Kjell Raa, BFG Fana                           30.47
2. Idar Helland, Vidar                            31.13
3. Bård Inge Bø, Stord IL                      33.16

Komplett resultatliste for Fitjardalten 2010 finn du her.