Saman med ein del andre skøyteseniorar har Onar Westerheim vore i Vikingskipet på Hamar denne helga. Der sette han like godt verdsrekord samanlagt i sin klasse.

Onar, som sjølvsagt er kjempefornøgd med resultata, fortel til Fitjarposten at dei var seks stykker frå Stord Skøyteklubb som tok turen over fjellet for å vere med på dette veteranstemnet.

På telefon frå Gardermoen fortel han vidare at av dei seks, var dei to fitjarbuar. Den andre fitjarbuen var Odd Larsen, som òg såg seg nøgd med resultata sine.

I slutten av februar kan det bli meir heider å hente. Då dreg den same gjengen til VM på skøyter for veteranar, ein meisterskap som vert arrangert i Bjugn her i Noreg. Onar fortel at då vil det vere over 200 deltakarar med, mellom anna sterke nederlendarar.

Onar Westerheim stilte i klassen 60 -65 år, Odd Larsen i 65-70 år.