Fitjar skulekorps gjekk i dag til topps i 3. divisjon for brasskorps under korpskonkurransen Sotrafestivalen.

Etter iherdig øving heile hausten, ein del ekstra øving no i november og fleire konsertopptredenar var skulekorpset i føremiddag klar for Sotrafestivalen. Det var ein litt trøtt og ganske spent gjeng som sette seg på ferja tidleg på morgonkvisten.

På Sotrafestivalen var det heile 70 opptrednar som skulle bedømmast, og dette skjedde parallelt på ulike arenaar. Fitjar skulekorps spelar i 3. divisjon for brasskorps og skulle framføra sitt konsertprogram i kantina på Fjell ungdomsskule. Divisjonen bestod eigentleg av 13 korps, men etter at tre trekte seg, sat Fitjar igjen med 9 dyktige konkurrentar.

Korpset, saman med sin dirigent Svein Roger Koppang, entra scenen presis klokka 12.05 til stor begeistring for ein stor heiagjeng i salen. Det var full klaff frå første tone, og for den som ikkje hadde eit lommeplagg i nærleiken var det godt å ha eit kamera å «gøyma» seg bak. «Prosesjon» sat svært, svært godt og fekk tilhøyrarane til å både verta rørte, få klump i halsen og å frysa nedover ryggen. Dei svinga vidare med Asia rock frå Easy pop suite, og salen svinga med. Som alltid var det ei fryd å lytta til vokalsoloen til Marthe V. Nordfonn på «Gabriellas song». Det vart bruk for lommeplagg nok ein gong, og tilhøyrarne i salen reiste seg i beundring etter dette nummeret. Avslutninga med «Celebration» var krona på verket, og fekk oss til å ynskja at musikken aldri skulle stoppa, men så vart siste marcato satt, korpset marsjerte ut og det var berre å venta på resultatet.

Musikantane presterte opp mot det aller beste dei kan, og det kan de vera svært nøgde med og stolte over, sa både styreleiar Ole Christian Ottestad og dirigent Svein Roger Koppang til musikantane etter framføringa. Lite visste dei då at det faktisk og var det aller beste som vart prestert av brasskrops i 3. divisjon denne dagen.

Først klokka 19.00 i kveld var det festkonsert med premieutdeling, og klokka 20.00 kom den gledelege meldinga om at Fitjar vann. Det var svært jevnt i toppen. Fitjar fekk 98,5 poeng, medan Midtre Sotra som kom på andre plass fekk 98 poeng.  Fordelinga mellom spelepoeng og programpoeng er ikkje klart enno, heller ikkje domarkommentarane. Dette vil etter kvart verta offentleggjort på skulekorpset si heimeside fitjarskulekorps.no.

«Heia Fitjar. Spel no bra, så blir heile bygda glad!», var heiagjengen si helsing til korpset. Korpset spelte bra, dei vann og no kan gleda bryta laus. Me helsar alle musikantane, dirigenten og støtteapparatet med alle foreldra: Gratulerer med sigeren!