Fitjar ad hoc, f.v. Harald Rydland, Gurid Refvik, Terje Træet, Martin Hatlevik, Heine Bernt Helland og Ole Christian Ottestad. Foto: Kjetil Rydland.

Ståande applaus og mykje vellæte hausta dei seks lokale musikantane i Fitjar ad hoc-ensemble etter temakvelden i kyrkja, og det var vel fortent.

– Me ser fram til å høyra den lokale gruppa med dugande musikarar på temakveld på Fitjar! skreiv Eli Simonsen på førehand.

Og ho blei ikkje skuffa – det blei heller ikkje dei 150-160 andre som hadde møtt opp i kyrkja i går. Me vil tru at alle blei imponerte over at dette er våre eigne som har så mykje å gi oss av glede, varme, variasjon og flotte musikkprestasjonar!

Dei lova at ikkje noko dei framførte skulle vera «ukristeleg», og dei heldt så absolutt det dei lova. Publikum fekk høyra eit variert program med viser, gospel, salmar, åndelege songar og folketonar, og i enkelte nummer fekk dei publikum med på allsong.

Martin Hatlevik solist i «Just a closer walk with Thee». Foto: Kjetil Rydland.

På programmet stod ei «salig blanding» av rolege og meir fartsfylte låtar, i dur og i moll. Me kan nemna «Blå salme», «Han tek ikkje glansen av livet», «Bred dina vida vingar», «Just a closer Walk with Thee» og «Down by the riverside». Flotte soloprestasjonar av Gurid Refvik, Martin Hatlevik og saksofonisten Ole Christian Ottestad sette ein ekstra spiss på opplevinga.

Me sluttar oss til dei takknemlege kommentarane frå benkeradene: – Dette var ei eineståande fin stund!

Fitjar ad hoc-ensemble:

Ad hoc kjem frå latin og tyder «for dette høvet». Ensemblet har ikkje faste øvingskveldar, men øver når dei har oppdrag. Desse eminente musikantane er med:

Gurid Refvik, song
Martin Hatlevik, song og gitar
Heine Helland, bassgitar og banjo
Ole Christian Ottestad, saksofon og tuba
Terje Træet, trommer
Harald Rydland, piano og trøorgel

Magne Røed og Maren Rydland fylte år, og fekk songen «Hurra for deg» i gåve. Foto: Kjetil Rydland.