Lite kjøt, men mykje godt ver, naturopplevingar og god stemning under årets jakthelg i Melen.

Rune Aarbø i Aarbø og Helland’s jaktlag fortel om ei flott helg i Melen med gode jaktkompisar. Etter mykje ruskever i det siste kunne dei ikkje ha vore heldigare med vêret under årets småviltjakt frå hytta i Melen.

Fredag ettermiddag skaut Håvard Helland den første haren sin for året. Og alt låg til rette for minst like god jakt dagen etter, fortel Rune Aarbø. Men hunden tok peiling på ein hare på sørsida av Inste Sølivatnet. Dermed var ho på feil side av kommunegrensa, og Fitjar-gjengen måtte henta bikkja og la haren gå. Dei skyt ikkje hare i område der dei ikkje har løyve.

Etter dette var bikkja meir eller mindre ferdig for dagen, fortel Rune. Ho er i sin beste alder, så ho burde klara å jakta fleire dagar i strekk. Men kanskje ho hadde det for godt i den varme hytta!

Dei såg ein og annan orrhane som dei kunne ha skote, men dei kom ikkje heilt på skothald. Den einaste fangsten resten av helga var ein aure på 200 gram, som Rune fekk ved utløpet av Inste Sølivatnet. Så det blei med haren som Håvard Helland skaut fredag ettermiddag.

Men dermed er viltgryta til neste års jakthelg sikra – det har etter kvart blitt tradisjon å koka jaktgryte på fjorårets fangst under haustens høgdepunkt på hytta i Melen.

Om du har lyst å lesa meir om jakt og friluftsliv, kan du sjå på heimesida til Aarbø og Helland’s jaktlag.

Ingressbilete: Lystig jaktlag i Melen. F.v. Terje Adreassen, Paul Vik, Kjell Magne Røed, Håvard Helland, Jarle Bukkøy og Helge Vik. Foto: Rune Aarbø.