Om lag 80 lokalhistorie-interesserte fann fredag kveld vegen til Fitjar folkebibliotek. Der fekk dei med seg  to fengslande foredrag, og tre bokslepp.

Det starte med Lars Arholm og Lars Rimbereid. Rimbereid har som kjend skrive bok om Arholm sine utrulege opplevingar, ikkje minst i frå krigstida. Og 87 år gamle Arholm fortalde så levande i frå det han har opplevd, at han hadde forsamlinga i "si hule hand", medan Lars Rimbereid sørgde for at dei  klarte å halda seg innanfor høveleg tid, ved god struktur. Etter ein pause var det så Magne Nygård sin tur. Han både las og fortalde om losoldermannen frå Torsdagsøy og familien hans. Fengjande og godt det òg.

No er det slik at bror til Lars Arholm, Samuel, også er bokaktuell, post mortem, i desse dagar. Dottera hans, Magnhild, var til stades og fortalde, og las, i frå diktboka hans som er krydra med nydelege foto av Jan Rabben. Etterpå vart det boksal, og svært mange gjekk heim med både ein, to eller tre bøker.

Arrangementet var eit samarbeid mellom Fitjar Folkebibliotek og Fitjarposten. Og bøkene er til sals hos T. Træet.