Gutelaget til Fitjar er på veg til Danmark for å feira påske med handballturneringa Holstebro Cup.

I kveld er laget på Ferja til Fjord Line frå Stavanger, og reknar med å vera framme i Danmark tysdag morgon kl. 09.00. Og rundt kl. 12.00 er dei på plass i Holstebro, heimstaden for Danmarks største innandørs internasjonale handballturnering for ungdom. Her blir Holstebro Cup avvikla for 31. gong i år, med over 3800 spelarar frå forskjellige land.

Gutane frå Fitjar stiller i klassen U16. Dei innleier Danmarks-opphaldet med tre dagar trening og moro, blant anna bowling og gokart. Alvoret startar først fredag, med kamp kl. 07.00, og i løpet av langfredagen skal dei spela heile fire innleiande kampar.

Mellomspelet blir avvikla på laurdag, og finalen søndag, kanskje med Fitjar på banen. Fitjar-gutane set i alle fall ikkje kursen heimover før søndag, etter at finalen har gått. Så dei har nok eit lite håp om å nå langt i turneringa. Fitjarposten vil følgja med og halda lesarane oppdaterte.