Tretti vinnarar av minidalten med kvar sin gullmedalje. Foto: Kjetil Rydland.

Søndag ettermiddag blei Fitjardalten avvikla med god deltaking, og favorittsigrar til Astrid Dahle frå Haugesund og Bjørn Tore Taranger frå BFG Fana.

Som vanleg var det flest deltakar i turklassen. Enkelte av desse nytta høvet til å gå eit par æresrundar inne på stadion, slik at dei fekk godkjent løpet som 10 km til idrettsmerket. Andre deltakarar sov seg gjennom turen, i vogna til mor, far eller besteforeldre.

Minidalten samla 30 deltakarar frå 2 til 10 år. Dei starta på løpebanen og sprang ein tur bort i byggjefeltet i Bakkjen og kom tilbake til mål etter eit løp på ein liten kilometer. I denne klassen var det berre vinnarar, og kvar enkelt fekk utdelt sin gullmedalje etter løpet.

I konkurranseklassen stilte 22  deltakarar; av desse var 6 kvinner. I fråvær av andre store kanonar, fekk begge vinnarane lett spel denne gongen. Astrid Dahle vann kvinneklassen klart, framfor ein annan gammal kjenning frå Haugesund, Bodil Melkevik. Tredjeplassen tok Tove Vikanes Agdestein frå Stord, medan 15-årige Maria Rydland blei nummer 4. I herreklassen gjentok Bjørn Tore Taranger, BFG Fana, suksessen frå Fitjar Halvmaraton tidlegare i år. Heilt frå første steg var han heilt suveren, og kom i mål med over eitt minutts margin til nummer 2, Per Martin Furevik frå Stord. Tredjeplassen gjekk til Bård Inge Bø frå Fitjar.

Andre sterke prestasjonar i herreklassen stod løpets yngste og eldste for. 12 år gamle Sjur Rydland kom i mål på den sterke tida 42.19, medan 70 år gamle Arne Innbjo frå Haugesund fekk tida 41.34.

Her er dei beste i kvar klasse; komplett resultatliste blir lagt ut så snart arrangøren har fått summa seg.

Damer:
1. Astrid Dahle, Haugesund IL          38.19
2. Bodil Melkevik, Haugesund          42.10
3. Tove Vikanes Agdestein, Stord IL 42.53
4. Maria Rydland, Fitjar IL               45.24

Herrar:
1. Bjørn Tore Taranger, BFG Fana     32.42
2. Per Martin Furevik, Stord IL           33.47
3. Bård Inge Bø, Fitjar IL                   34.20

Tretti vinnarar av minidalten med kvar sin gullmedalje. Foto: Kjetil Rydland.