Emma Hjelle, med pappa Kjetil Hjelle, i full fart i stemplingsløypa. Foto: Ingrid Hovstad

Rundt 50 personar naut sola og kjekke aktivitetar i Rossneset på Finn-fram-dagen.

Orienteringsgruppa i Fitjar Idrettslag inviterte til Finn-fram-dag i Rossneset i går. Med veret på laget, vart det ein nydeleg dag med mange kjekke aktivitetar for små og store.

Dagen starta ved Idrettsparken, der ein fekk kart og svarark til ei quizløype. Denne leia ut til «konsulatet» i Rossneset. Små og store svara ivrig på vegen ut, og det venta premie til dei minste ved fullført løype.

Familien Rimmereid i full sving med quizløypa. Foto: Ingrid Hovstad

Ved «konsulatet» kunne ein kjøpa pølser, kake og kaffi. Ein kunne tippa lengda på ein kabel, tyngda på ein stein og talet snopebitar i eit glas.

Den mest populære aktiviteten var stemplingsløypa. Mange av dei minste sprang den fleire gongar i eit forsøk på å slå rekorden sin, eller å vera raskare enn søskena sine. Heile tre personar sprang på 42 sekund, og kunne plukka seg ut ein premie.

Jonathan Torvund Midtsæter trefte idealtida, og stakk av med eit påskeegg. Idealtida var midt mellom løypetida til Rolf-Atle Rolfsnes og Jens Øien Kloster i o-gruppa.

Jonathan Torvund Midtsæter var godt nøgd med premien. Foto: Ingrid Hovstad

Nokre nytta ogso dagen til å leita etter stolpar. Stolpejakt-sesongen starta nemleg i går, og fleire av stolpane er plassert ute i Rossneset. Brosjyren kom i postkassane til folk i dag, men kan ogso hentast fleire stadar i Fitjar sentrum.

Til slutt var det skattejakt. Her måtte ein finna 6 tal ved ulike postar rundt «konsulatet». Ivrige la dei i veg med kart i handa, og augo opne. Skattekista var nemleg ogso gøymt, og måtte finnast på vegen. Når kista var funne og alle var komen att frå skattejakta, måtte tala settast saman for å opna dei to hengelåsane på kista. Spente venta dei rundt kista, og til stor glede var det seigmenn inni.

Kva er i skattekista?? Foto: Ingrid Hovstad

Gjekk du glipp av finn-fram-dagen? Ingen fare, det vert tre til i år. Den neste 28.april ved Kidnavatnet, deretter 30.mai ved Øvrebygda skule, før den siste vert 15.sep ved Kidnavatnet. O-gruppa håpar enno fleire tek turen ved neste finn-fram-dag.