Lagkaptein Helge Træet, Torbjørn Korsvik og Øyvind Fuge Rydland jublar for utlikning. Foto: Kjetil Rydland.

Fitjar vann sin første siger på tre månader då dei snudde kampen i Fitjar Idrettspark i dag og vann 3-1 over toarlaget til Loddefjord.

A-laget til Fitjar hadde ikkje vunne ein kamp sidan serieoppgjeret mot Halsnøy / Trio 2 i slutten av juni. Poengtørken skuldast ikkje berre dårleg spel, for spelemessig har hausten eigentleg vore brukbar. Men ein massiv motgang har vist seg vanskeleg å snu.

Ballen dalar ned i mål, utanfor rekkevidda til Fitjar-keeper Ruben Træet. Foto: Kjetil Rydland.

I kamp etter kamp har dei vore fullt på høgd med motstandarane sine, men manglande sjølvtillit og manglande målteft har sendt «Dikki» sine beste menn slukøyra av banen. Som kjent får ein sjølvtillit av å vinna fotballkampar, og kanskje me kan vona på eit lite mirakel heilt på slutten av sesongen?

Mot Loddefjord 2 var det Fitjar som kom best i gang, og heimelaget kom til fleire store sjansar framfor ein svært usikker Loddefjord-keeper. Men den eine Fitjar-spelaren etter den andre viste manglande effektivitet og sjølvtillit i avgjerande sekund. Derfor var det nesten som om alt var som det skulle vera då Loddefjord tok leiinga 1-0 eit halvt minutt før første omgang var over. Marcus Vindenes tok frispark rett utanfor hjørnet av 16-meteren, og ballen dala fint ned i bortarste vinkelen, langt utanfor rekkevidda til Fitjar-keeper Ruben Træet.

Oppeldna av den litt heldige leiinga rett før pause kom bergensarane ut att på den våte banen med ny sjølvtillit. Dei såg ut til å ta tak i kampen og hadde sin beste periode i det første kvarteret av andre omgang. Men heldigvis lukkast dei ikkje framfor mål, og i staden begynte lukka å smila gjennom regnbyene til våte og forkomne Fitjar-spelarar.

Først blei det utlikning etter vel eit kvarter ved Torbjørn Korsvik, som heada kontant i mål ein fin corner frå Kristian Træet. Og rundt midten av andre omgang hadde Fitjar snudd kampen. Øyvind Fluge Rydland kom fint fri på venstrekanten, og innlegget på femmeteren sklei Jonas Aleksandersen i mål. Same mann blei dagens mann for Fitjar då han la på til 3-1, som òg blei sluttresultatet. Han tok eit frispark frå over 30 meter, og ballen gjekk i ein fin boge før han sneik seg inn i krysset.

Med dette var kampen avgjort, sjølv om mykje kan skje på ei glatt grasmatte for folk med dårlege knottar under skorne. Men i dag smilte endeleg lukka til Fitjar-spelarane, som fekk med seg tre nødvendige og velfortente poeng. No er dei ikkje håplaust akterutseilt i botnen av tabellen for 5. divisjon adv. 03 Hordaland. Men på tredje siste plass blinkar nedrykkspøkelset framleis stygt.

Neste helg møter dei serieleiar Smørås på bortebane, og det kan bli ei stor utfordring. Neste heimekamp er mot Vadmyra laurdag 6. oktober.

Trond Henriksen jublar for siger og endå ein A-kamp for Fitjar. Foto: Kjetil Rydland.

Fitjar – Loddefjord 2: 3-1 (0-1)
seriekamp 5. divisjon avd. 03 Hordaland
Fitjar Idrettspark
Søndag 23. september kl. 14.00
Dommar: Charles André Gjessing Whiteley, Kalandseid IL
Publikum: 42

Mål: 0-1 Marcus Vindenes (44), 1-1 Torbjørn Korsvik (63), 2-1 Jonas Aleksandersen (68),  3-1 Jonas Aleksandersen (81)

Gult kort for Fitjar: Jonas Aleksandersen (47) og Didrik Steensohn (90).

Fitjar sitt lag mot Loddefjord 2: Ruben Træet, Brynjar T. Engelsen, Leif Tore Aarland, Torbjørn Korsvik, Svein Arne Raunholm, Øyvind Fluge Rydland (Lars Fitjar Waage 73), Helge Myrmel Træet (kaptein), Jonas Aleksandersen (Lars T. Engelsen 81), Kristian Træet, Jonas Yang Tislevoll (Trond Henriksen 90) og Daniel Skarpnes (Didrik Steensohn (87).

Roald M. Nilsen, Magne Siglen, Åsmund Sørfonn og Oddgeir Træet vonar den gamle sofagruppa til Nilsen kan vera med og snu vinnarlukka for Fitjar Idrettslag.