Fitjar hala i land ein 2-1-siger mot Sund i Fitjar Idrettspark i dag. Sigeren sat langt inne, men tre poeng er tre poeng. Bildet: Jonas Tislevoll skåra eit av måla og skapte fleire gonger uro i Sund-forsvaret. Foto: Håkon C. Hartvedt

Det var poenga som gledde mest etter denne kampen. Fitjar har slite med skadar, og verre vart det då både Oddgeir Træet, Øyvind Fykse Lie, Emil Fitjar og Sebastian Thomassen måtte ut med skadar i dag. Kor alvorlege dei er veit me ikkje mykje om, men vonleg er spelarane tilbake etter kort tid.

Bra er det at både Kjell Andre Thorland og Leif Andre Tangen er tilbake – og om nokre veker er òg truleg Thomas V. Waage på plass igjen. Men det er ikkje lett å vinne kampar når ein har eit skadeskote lag. Difor skal fitjarspelarane ha ære for at dei vann kampen i dag. Ein kamp som var prega av nervøsitet, mange personlege feil og ureint spel. Dommaren måtte ut med fire gule kort. To til Fitjar og to til Sund. Han kom etter vårt syn godt ifrå kampen.

Torbjørn Korsvik jobba godt bak i feltet og vart kåra til dagens fitjarspelar. Vel fortent. Foto: Håkon C. Hartvedt

 

Elles vil me trekkje fram Øyvind Fykse Lie, Mats Brakedal, Leif Andre Tangen og Jonas Tislevoll i denne kampen.

Leif Andre Tangen i kamp med ein Sund-forsvarar. Foto: Håkon C. Hartvedt

Fitjar tok leiinga med eit flott og noko uventa skot av Øyvind Fykse Lie, servert av Mats Brakedal 36. minutt ut i 1. omgang – og kunne gå til pause med dette resultatet. Ein halv time ut i 2. omgang reduserte Sund med ein nydeleg volley av Hans Kristian Bremnes. Lukkelegvis slo Fitjar tilbake berre tre minutt etter. Jonas Tislevoll kom seg flott igjennom Sund-forsvaret og netta via ein Sund-forsvarar.

Fitjar sitt lag i dag var: Oddgeir Træet (Aleksander Henriksen fra ca 20 min), Emil Fitjar (Sebastian T. Thomassen frå 16. min – Adrian Mehammer frå 69 min), Johannes Myhre, Roger Almås (Trond Henriksen fra 79. min), Leif Andre Tangen, Øyvind Fykse Lie (Mats Westvik fra 86 min), Kjell Andre Thorland, Mats Brakedal, Torbjørn Korsvik, Badi Hurasi og Jonas Tislevoll (Frode Malkenes frå 81 min).