Medan elgen gøymer seg i skogen, sit elghunden Milla heime i stova. Foto: Kjetil Rydland.

Som kjent har ei elgku med kalv blitt sett i bygda i det siste, og fleire ivrige elghundar har vore ute i skogen for å følgja spora, men ikkje alle har fått vera med.

Ei som så absolutt ville vore ute og jobba med det ho er skapt for, er elghunden Milla. Men ho må fint sitja heime i stova til Karl André Rydland og passa på dei små kvalpane sine.

Ho fekk ni – 9 – kvalpar for snart fire veker sidan, og dei var velkomne til verda både for Milla og den glade hundeeigaren. Men litt dårleg timing var det, for no hadde ho hatt sitt livs sjanse til å lukta opp elgspor i skogen.

I staden måtte Milla overlata jobben til dei unge sønene sine, Simba og Cedrik, som begge har vore i skogen på Tislavoll og Rydland for å prøva å finna spor etter elg. Men bortsett frå spora som me skreiv om på søndag, har ingen hatt nærkontakt med elg sidan.

Milla er oppteken med å oppdra dei ni sjarmtrolla heime i stova. Dei begynner å bli svært så søte, og finare kjem dei til å bli. Om rundt ein månad er dei leveringsklare, fortel Karl André. Han har allereie selt fem av dei, og reknar med at det skal gå greitt å få selt dei fire siste.

Ein liten elghundkvalp kostar 15 000 kroner, men dette er kvalitetshundar med skikkeleg stamtavle. Milla er godkjend ettersøkshund og kjem opphavleg frå Sverige. Faren er ein framståande rakkje frå Risør med stamtavla i orden. Han heiter Jegerlivets Ailo, og brukte berre to forsøk på å skyta blink, og bli opphav til dei ni søte, små krabatane.

Elghundar er ikkje berre eigna som ettersøkshundar; dei er òg kjekke familiehundar, meiner Karl André Rydland. Dei har godt lynne, er ikkje så altfor store, og er lette å ha i hus, seier den glade hundeeigaren og jegeren.

Så søte er kvalpane no når dei nærmar seg fire veker. Foto: Kjetil Rydland.
Her ser me Cedrik på leiting etter elgspor. Foto: Kjetil Rydland.