A-laget spelte ein god kamp mot det beste laget som har vitja Fitjar i haust, og kapra eitt poeng etter 2-2.

På ein overraskande sleip grasbane i Fitjar Idrettspark fekk me sjå ein høgdramatisk og god fotballkamp laurdag ettermiddag. Follese er eitt av tre lag som har utmerkt seg i puljen til Fitjar i år, og kom for å sikra seg tre poeng, og heng på Austevoll i kampen om opprykk.

Men heimelaget spelte sin beste kamp i haust, i alle høve om me tar omsyn til motstand og føreforhold. Publikum heldt på å setja første vafla i halsen då Kjell André Thorland gav Fitjar 1-0 allereie etter tre minutts spel. Måpande såg dei «Kjella» setja eit frispart frå 25 meter nesten heilt oppe i vinkelen.

Dei sterke askøyværingane kom seg ikkje etter kalddusjen, og blei liggjande merkeleg lågt. Dermed kunne Fitjar spela seg til fleire store sjansar. Etter eit kvarter redda gjesteforsvaret på streken eit skot frå kort hald, etter møljespel framfor Follese-målet. Eit par minutt seinare var Jan Åge Tislevoll nesten gjennom, og etter ein halvtimes spel heldt eit innlegg frå Leif André Tangen på å snika seg inn i vinkelen.

Det var såleis ikkje ufortent at Fitjar kunne gå opp til 2-0 ved Jan Åge Tislevoll, som blei spela fint gjennom av Badi Hurasi. Med tomålsleiing til pause hadde Fitjar kanskje fått eit psykisk overtak på motstandarane sine, men slik skulle det ikkje gå. Follese hadde etter kvart vist seg farlege på corner, og tre minutt før pause fekk Sander Søreide Skogen gå uhindra opp og «knusa» ballen utakbart i mål.

I byrjinga av andre omgang hadde gjestene sin beste periode i kampen, og vaklevorne Fitjar-spelarar hadde meir enn nok med å klora seg fast i det våte graset. Dei teknisk gode Follese-spelarane kom gong etter gong rundt på kantane, og slo farlege innlegg eller gjekk rett mot mål. Berre ei feberredning av Fitjar-keeper Aleksander Henriksen hindra utlikning då ein stygg «deflection» heldt på snika seg under tverrliggjaren.

Rett etterpå fekk Follese likevel utlikninga si. Corneren som følgde blei slegen høgt inn i feltet, og der gjekk Trygve Bruvik Elligstad høgast opp av alle, og heada ballen utakbart i mål. Nesten identisk situasjon med det første Follese-målet. Utover i andre omgang var nok gjestene det beste laget, men begge lag hadde store sjansar til å avgjera kampen. Thomas V. Waage kom innpå for ein annan gammal kjenning, Ronald Skår. Toppscoraren til Fitjar ser ut til å vera på veg tilbake for fullt, og hadde fleire sjansar til å avgjera kampen. 

Men Follese hadde minst like mange og farlege sjansar, så alt i alt må nok Fitjar-gutane seia seg fornøgde med eitt poeng mot det beste laget som har vitja Fitjar i haust. Me 2-2 ebba den dramatiske og høgst sjåverdige kampen ut. Heile laget til Fitjar spelte bra fotball. Den unge keeperen Aleksander Henriksen kom godt frå kampen, men bestemannspremien gjekk heilt fortent til Helge M. Træet, som kan venta seg ein middag på Fitjar Fjordhotell.

Med sine 22 poeng er Fitjar no nede på ein 8.-plass på tabellen for 4. divisjon, og det er framleis eit stykke ned til botnstriden. Men laget er enno ikkje trygt, og treng poeng mot laga som ligg rundt dei på tabellen. Førstkomande fredag er det bortekamp mot Baune, og laurdag 4. oktober er det ny heimekamp, mot Djerv. Dette er to kampar der det blir særs viktig å kapra poeng, for å halda botnstriden på avstand.

Ingressbilete: Jan Åge Tislevoll spela ein god kamp og scora eitt mål mot Follese. Foto: Kjetil Rydland.