Thomas Vestbøstad Waage legg på til 3-1 for Fitjar. Foto: Kjetil Rydland.

To lag som før dagens kamp var klare for neste års 6. divisjon, leverte ingen stor kamp på Fitjar-graset i dag, men heimelaget vann ein fortent 3-2-siger over Halsnøy / Trio 2 etter to mål av tidenes storscorar i Fitjar, Thomas Vestbøstad Waage.

Dei to gamle rivalane som møttest i dag, har levert mange høgdramatiske kampar av høgare kvalitet eit det dei hadde å by eit småfrose publikum i Fitjar Idrettspark laurdag ettermiddag. Etter alt å dømma har begge laga rykt ned til 6. divisjon, og det var avgjort før dagens kamp. Halsnøy i samarbeid med Trio 2 kunne med storsiger over Fitjar i dag ha gått forbi rivalane sine. Men begge laga var vel plasserte på nest siste og tredje siste plass på tabellen.

Spesielt i første omgang fekk me sjå kva me kan venta oss i 6. divisjon til neste år. Me såg lite av det friske angrepsspelet som Fitjar viste i førre heimekamp. Men kvinnheringane viste endå mindre som var eigna til å varma publikum i den råkalde haustlufta. 0-0 til pause var som det måtte bli av to lag som ikkje har trent altfor mykje i år.

Heldigvis løfta kampen seg noko etter pause, spesielt for Fitjar sin del. Før det hadde gått fem minutt, gjekk heimelaget opp til 1-0 ved Jonas Yang Tislevoll. Frå godt over 16 meter la han ein retur over keeper, som var på halvdistanse. Dermed skulle ein tru at Fitjar kunne festa grepet og cruisa inn tre poeng. Men Halsnøy/Trio kom inn att i kampen, og utlikna ved Håvard Vågen nokre minutt seinare.

Mannen som kom til å avgjera for Fitjar i dag, var tidenes toppscorar, Thomas Vestbøstad Waage. Han kom inn etter at gjestene hadde utlikna, og brukte ikkje så mange minutt på å bringa Fitjar i leiinga. Thomas sette inn ein retur etter han sjølv hadde heada utan å få ballen forbi keeper. Og litt seinare sette han inn 3-1 på eit fint skot frå rundt 16 meter.

Heller ikkje dette var nok til å drepa kampen. Fem minutt før slutt scora Simen Mehammer på eit frispark frå hjørnet av 16-meteren. Ballen gjekk i ein fin boge over alt og alle og landa i vinkelen. Eit flott mål, men ikkje nok til å truga Fitjar, som kunne innkassera tre velfortente poeng. Men dei kom for seint, og betydde lite for neste sesong.

Med Bønes sitt eine poeng mot Loddefjord 2 sist søndag forsvann Fitjar sin siste sjanse til å bli fjerde sist i 5. divisjon. Mykje rart må skje om det ikkje blir 6. divisjon på Fitjar til neste år. Folk som har studert tabellane oppover i systemet, slår fast at fleire lag må trekkja seg for at det skal bli ei opning for Fitjar i 5. divisjon 2019.

Dagens kamp var vel stadfesting av at tabellen ikkje lyg, ingen av dei to nedrykkslaga leverte nokon stor kamp. No er det berre å håpa at alle gode krefter i Fitjar-fotballen kan samla seg om å bringa oss opp av bølgjedalen snarast råd.

Jonas Yang Tislevoll viste som vanleg stor innsatsvilje, og scora det første målet for Fitjar. Foto: Kjetil Rydland.

Fitjar – Halsnøy/Trio 2:  3-2 (0-0)

seriekamp 5. divisjon avd. 03 Hordaland
Fitjar Idrettspark
Laurdag 20. oktober kl. 13.00
Publikum: 60
Dommar: Roar Wold, Søfteland TIL

Mål: 1-0 Jonas Yang Tislevoll (50. min.), 1-1 Håvard Vågen (63. min.), 3-1 Thomas Vestbøstad Wage (72. min.), 3-1 Thomas Vestbøstad Waage(80. min.)

Fitjar sitt lag mot Halsnøy / Trio 2: Oddgeir Træet, Lars T. Engelsen, Torbjørn Korsvik, Nils Ingard Tislevoll, Svein Arne Jordan Raunholm, Helge Myrmel Træet (kaptein), Leif Tore Aarland (Kristian Træet 68.), Jonas Aleksandersen (Rezwan M. Kadir 63.), Øyvind Fluge Rydland (Thomas V. Waage 63.), Øyvind Fykse Lie (Marius Helland Storebø 85.), Jonas Yang Tislevoll.