Lukta av nysteikte vaflar strøymer i mot dei som tek turen til Prestbø i ettermiddag.

Men det er nok ikkje først og fremst vaflane som lokkar folk til gards i dag. Jostein Prestbø fortel om idéen med open dag; det er  eit nytt tiltak som han  vonar kan utviklast vidare neste år. Målet er å ha ein dag der folk kan slappe av og kose seg med å grille og attpå til få vaflar til kaffien, sjølvsagt med bringebærsyltetøy. Dessutan er det einaste dagen då folk kan drive sjølvplukk. Kjøp av ferdigplukka bær av dagens avling er også mogeleg . Lat oss med same nemne at bæra skal vere ferske, påpeikar Jostein, det vil seie selde innan eitt døger. Jostein har laga sti opp til Storhaugen der det er flott utsikt i alle retningar, og langs denne er det lagt ut ein natursti.  Grillar står ferdige for dei som vil lage seg middag og nyte  poteter og salat av lokale råvarer. Området rundt bringebærfelta gir plass til mange som vil nyte den flotte sommardagen. 

Me fekk ein prat med Amalie som jobbar litt for pappa Jostein. Ho er med på veging eller sel bringebær på Heiane saman med storesyster. Amalie og syskenbarnet Ingeborg seier det er kjempegodt med bringebær med vaniljesaus på.  Me er nok mange som er enige i det, og dei gule bæra passar best til dessert. Når besøket på Prestbø er slutt, kan det høve å ta seg eit bad i Breiavikjo eller i sjøen. Storavatnet har ein godt brukande temperatur i desse dagar. I går viste termometeret 20 grader i sjøen. 

I følgje Jostein blir det ein kort og intens bringebærsesong i denne varmen. Dei som vil sikre seg store og velsmakande bær frå Prestbø, bør ikkje vente så lenge.

 

Ingressbilete: Borgny Julianne Vevle Tufte (t.v.) og Maria Prestbø steikjer vaflar og Tor Galta vil gjerne smake.