Sola skein over MacGyver-dagane 2010 i Synningjo laurdag ettermiddag, og årets markering stod ikkje noko til atters for fjorårårets braksuksess.

Om lag 50 interesserte MacGyver-fans strøymde frå fjern og nær til Synningjo for å vera med på eittårsjubileet for MacGyver-dagane. Og ingen blei vonbrotne; dei fekk oppleva eit strålande eventyr i strålande sommarver i den vakre nauturen.

Tradisjonen tru ønskte initiativtakar Runar S. Skogedal velkommen. Også i år stod han for den høgtidelege opninga ved å klippa over MacGyver-tapen. Til opningsseremonien høyrde og ein flott salutt på bakken til Bjørn Haaland. Om mogeleg var den endå meir imponerande enn i fjor, og gav dei skrekkslagne festivaldeltakarane skikkeleg bakoversveis.

For å koma i ekte MacGyver-stemning trekte så forsamlinga inn i hønsehuset til Bjørn Haaland. Der blei ein av dei mest spanande MacGyver-episodane vist på video. Og dermed blei alle klare til å gå i gang med ekte, dramatiske MacGyver-aktivitetar ute i den fine lauvskogen. I ekte MacGyver-ånd viste Geir Tore Søreide, medlem i arrangementskomiteen, den eksplosive krafta i blandinga av Cola, saueskit og ormegras. Etter å ha rørt alt saman og rista Cola-flaska, kasta han den mot den gamle leikehytta til Bjørn Haaland. Og i ein smell og eit flammehav som skremte vatnet av tilskodarane, var hytta borte, og den blir nok aldri meir spurd.

Likevel var nok den mest dramatiske og krevjande aktiviteten, som i fjor, å berga forkomne jenter som hadde blitt fanga og bundne fast med MacGyver-tape, og forlatne i nød ute i skogen. Så vidt me kunne sjå, blei alle berga og førte trygt tilbake til base camp på bakken ved Storavatnet.

På den idylliske opninga i skogen nede ved Storavatnet blei dramatikken avløyst av ei fredeleg matøkt. Arrangementskomiteem spanderte pølser, brus og kaffi, og Evy Skogedal, serverte ekte MacGyver-kake. Etter matpausen bar det attende til tunet i Synningjo. Her blei årets feiring avslutta med eit par nye, MacGyver-inspirerte aktivitetar, pilkasting og bogeskyting. Avslutningsøvinga var i år som i fjor tautrekking. Denne blei vunnen av damene; rett nok kunne det sjå ut for oss som om dei var i klart fleirtal …

Årets MacGyver-feiring gav meirsmak, og det er ingen grunn til å tru at det ikkje kjem nye MacGyver-dagar i framtida. Som ein av dei yngre deltakarane sa det: «Den beste dagen i året». Me gler oss allereie til neste år.

steroide anabolisant effet secondaire