Kyrre Thomassen og Jacob Myhre t.v. vann Fortnite for tomannslag. Daniel Prestbø t.h. vann den individuelle konkurransen. Foto: Kjetil Rydland.

Denne helga har driftige ungdommar i Fitjar jobba dag og natt – bokstaveleg talt – og kome vel i hamn med eit stort dataparty i Fitjar kultur- og idrettsbygg.

Fitjar ungdomsråd lukkast så godt med LAN i mars at det gav meirsmak. Og med litt hjelp frå kultursjef Bente Bjelland, og ein del vaksne vakter, fekk dei til eit nytt vellukka dataparty denne helga.

LAN-ansvarleg Håvard Fitjar har fått besøk av Ida Taranger Alvsvåg, der hans sit på podiet og registrerer resultat frå gamingkonkurransane. Foto: Kjetil Rydland.

Heile 63 deltakarar fekk dei med seg, dei aller fleste lokale heltar frå Fitjar. Dei kunne ha teke imot nesten 50 fleire, men talet er likevel ein monaleg auke frå dei 40 som var med i mars.

Partyet opna fredag kveld klokka 21, og så gjekk det døgeret på sint tamp fram til søndag føremiddag. Slik denne typen dataparty skal gjera. I eine halvdelen av idrettshallen hadde mange ungdommar rigga seg til meg madrasser og senger, der dei kunne lura seg til ein pause innimellom slaga. Andre tok seg ein tur heim for å samla krefter til nye nappetak med datafrelste vener.

Etter å ha sett over dei mange dataskjermane i idrettshallen kunne me konstatera at det var mange slags spel representert. Men størst spenning – og prestisje – knytte seg til konkurransane i Fortnite og CS:GO. Her var dei beste premiane for flinke gamarar.

I Fortnite-kunkurransen der dei spelar åleine vann Daniel Prestbø, og i duoturneringa gjekk Kyrre Thomassen og Jakob Myhre til topps. Det blei eitt gåvekort på 500 kroner til kvar topplassering. Den største premien gjekk til vinnarane av CS:GO. Her gjekk Team Gap Gaming (Birk Vestvik og Jonas Midtsæter) til topps, og vann eit gåvekort på 1000 kr på deling.

Me gratulerer vinnarane, og ikkje minst Fitjar ungdomsråd med eit godt gjennomført arrangement.

Mari Hatlevik og Marion Træet spelar Fortnite. Foto: Kjetil Rydland.
Heile 63 ungdommar spelte data i idrettshallen natt og dag denne helga. Foto: Kjetil Rydland.
Eirk Fitjar og Jens Øien Kloster spelar Farming Simulator, som går ut på å driva gard. Foto: Kjetil Rydland.
I andre enden av idrettshallen nytta ungdommane høvet til lura han av innimellom. Foto: Kjetil Rydland.
Romante Zemgulyte spelar GTA5 med Svanhild Gjøen Vestbøstad, som har gøymt seg inni hettegenseren. Foto: Kjetil Rydland.
- Annonse -