Julia Groot Hjøllo med ein krabbe som snart skal opp i den sorte gryte. Foto: Selevik skule.

Førsteklassingen var frå seg av begeistring då ho fekk vera med Selevik skule på fiskedag hos Onar Westerheim denne veka, og var ikkje den einaste som var strålande fornøgd.

Tradisjonen tru har Selevik skule hatt fiskedagar i «fiskerihamna» til Onar Westerheim denne veka. Etter at han slutta som rektor, har Onar teke imot lærarar og elevar frå gamleskulen sin kvar haust.

I løpet av to flotte fiskedagar – med strålande haustvêr – har ungane fått fiska med stong frå kai og båt, vore med og trekt garn og plukka ut krabbar frå krabbeteiner.

Onar Westerheim og elevane kjem inn frå feltet med fangsten. Foto: Selevik skule.

Som vanleg fekk elevane sløya og laga til fisken for steiking – og dei kokte krabbe over ei grue i strandkanten. Enkelte fekk smaka krabbe for første gong, og ville ha meir!

Rektor Elisabeth Kjærland fortel at elevane storkosa seg. Dei hadde ein heil dag ved sjøen, og då dei skulle gå heim, utbraut ein elev: «Me har jo ikkje lært «nokon ting» i dag!»

– Eleven tenkjer vel at ein berre lærer når ein sit i klasserommet, men det stemmer jo ikkje, understrekar rektor Kjærland, me har lært mykje i løpet av ein heil fiskedag!

Onar viste anatomien til fisken ved å spretta opp ein fisk og visa hjarte, tarmar, svømmeblære og magesekk – og kva spennande som var inni magesekken. «Kva har fisken ete?» lurte ungane på. Dei blei svært så fasinerte, og sa i kor: «Oiiii!» og «Ææææsj!».

Elevane fekk læra å laga til eit bål for å koka vatn til krabbepanna, og å laga til ei god grue til steiketakka som dei skulle steikja fisken på.

I garnet fekk dei blant anna lange, makrell, torsk, blåskål, lyr, pale, flyndre, krabbe og sjøstjerner.

– Gamlerektor Onar Westerheim syntest det var veldig kjekt å ha besøk av så kjekke og positive ungar, seier Elisabeth Kjærland. Han håpar at me kjem tilbake neste år, og det vil me gjerne! avsluttar ein storfornøgd rektor.

Gamlerektoren, Onar Westerheim, stiller kvart å båt og fiskerihamn til rådvelde for skulen, og her har dei børsta støvet av ein annan gammal travar, Vilhelm K. Sjøvold. Foto: Selevik skule.
Mykje fin fisk i stampen. Foto: Selevik skule.
Som vanleg på slike fiskedagar fekk elevane sløya fisk på kaien. Foto: Selevik skule.
Thomas Skogheim Seddon med ein flott torsk. Foto: Selevik skule.
Jannike Weber koser seg med nykokt krabbe. Ho hadde bursdag den dagen. Foto: Selevik skule.
Krabben godgjer seg i den svarte gryta. Foto: Selevik skule.