Astrid Kjellevold i aksjon. Foto frå Kjellevold sin instagram : kunst_ak

Laurdag 25.mai vert det opning av kunstutstillinga til Astrid Kjellevold.

Det har vore mykje aktivitet på Galleri Losjen dei siste månadane: hatteutstilling, barneboklansering, fotografiutstilling og besøk frå verdskjente Kjell Pahr Iversen. No er det Astrid Kjellevold som skal få visa fram sin kunst i det vesle galleriet.

– Eg bur på Stord, og har tre snart vaksne born, ein nabokatt og ein haltande Fiat 500, skriv Kjellevold, som til dagleg leiar er i Atheno.

Ho har vart introdusert til teikning, måling og keramikk på barneskulen av ei som var formingslærar.

– I tillegg hadde eg ei bestemor som forventa at me lærte oss strikking, hekling og hardangersaum i ung alder, fortel Kjellevold.

Astrid Kjellevold bygga vidare på skapargleda ho fekk av desse to, og har no mala sidan ho gjekk på ungdomsskulen.

Lag på lag på store lerret

– Det har vore mange uttrykk gjennom åra, og i dei siste 20-25 åra har eg mala med både akryl og oljemaling, fortel Kjellevold. Ho likar best å arbeida på store lerret, sjølv om dette er krevjande når det kjem til tid og teknikk.

– Eg malar lag på lag, ofte 5-6 lag i eit bilete. Det tek tid, men det er veldig inspirerande arbeid. Når eg finn den rette fargeblandinga flyr timane forbi.

- Annonse -

Kjellevold er glad i det abstrakte, og syntest det er stas når folk opplever og føler heilt ulike ting av å sjå på bileta hennar.

Ho har selt kunsten sin i mange år, men det å stilla den ut i eit galleri er nytt for henne.

– Eg gler meg til utstillinga på Galleri Losjen. Både til opninga, men også den neste veka. Veldig kjekt om folk kjem innom utover veka ogso, avsluttar Kjellevold.

Utstillinga vert opna av ordførar Wenche Tislevoll den 25.mai kl.15.00. Utstillinga kan vitjast frå kl. 17.00 til 19.00 den 26.mai til 2.juni.