Handballdamene til Fitjar IL kjempa lenge jamt mot fysisk sterke Salhus-jenter, men måtte gi tapt på slutten.

Bortesigeren til Salhus blei så klar som 26-20, etter at Fitjar hadde leia til det var mindre enn eit kvarter igjen av kampen.

Laga følgde kvarandre som skuggar mesteparten av kampen, bortsett frå to «dødperiodar» frå Fitjar-damene si side. Den første av desse kom på slutten av førsteomgangen, og Salhus gjekk til pause med leiing 14-12.

I andre omgang kom Fitjar godt i gang, og leia stort sett med eitt mål utover til det var knapt eit kvarter igjen av kampen. Men derfrå og inn var det slutt. I løpet av fire minutt gjekk gjestene frå 18-19 til 23-19, og avgjorde kampen til sin fordel.
Den gode heimekeeperen Lisa Folkedal gjekk tom for matchvinnarredningar, medan bortekeeperen stengte buret sitt. – Det var me som gjorde hennne god, sa Fitjar-jentene etter kampen. I alle høve tok ho det meste som kom, eller Fitjar-skota gjekk i stengene.

– Me tapte på tekniske feil, sa Fitjar-trenar Trond Arnevik, som ikkje var direkte misfornøgd etter kampen. Elles såg han det same som oss, at damene ikkje hadde marginane med seg, i ein jamn kamp.

Førstkomande tysdag får dameleget ein ny sjanse til å sikra seg den første sigeren for sesongen. Då møter dei Nore Neset heime i Fitjar kultur- og idrettbygg. Terminliste og tabell for 5. divisjon kan du studera her.

Fitjar sitt lag mot Salhus (scoringar i parentes): Lisa Folkedal (k), Ida S. Fitjar (k), Charlotte Ayoe Solberg (3), Randi Thorland (3), Miriam Almås (6), Maria Larsen (3), Lillian Gjuvsland (1), Julie S. Jesen, Ingvild Rimmereid (4).

Ingressbilete: Salhus-keeperen gjorde seg heilt umogeleg, og stengte buret mot slutten av kampen. Foto: Kjetil Rydland.