Det starta eigentleg i fjor då Karl Gloppen lanserte bok på Fitjar folkebibliotek. Bibliotekar Elin Siglen ønskte å gjera dette til ein tradisjon, og førstkomande søndag vert tre nye bøker lansert på biblioteket.

Den første boka av dei tre er «Anna Rasmine» av Magne Nygård. I 2006 gav han ut boka «Losoldermannen og familien hans» om tippoldemora si «Tyrianna» frå Fitjarøyane. I den siste boka går han nærare i tid, og vi får denne gongen høyra historia om «Anna Rasmine», oldemor hans. Ho levde frå 1851 til 1867 og vart oppfostra hos tanta og onkelen sin på Torsdagsøy. Ho er ikkje berre oldemor til Magne, men òg til Ingebrigt og Martin Nygård, godt kjende fitjabuar mellom oss som lever i dag. Anna Rasmine var i teneste i Bergen og fann seg ein mann i frå Osterøy, før ho tok turen tilbake til Torsdagsøy. Ei spennande historie som me vil få høyra meir om på søndag.

Steinar Hystad har gjeve ut mange populære bøker frå nærmiljøet vårt i lag med Tor Resser. Mimrebøker frå svunnen tid. I år er han ute med «Langenuen var hovudvegen“ der det òg er ein del fitjarstoff med. Boka handlar om både båtruter og utbygging av vegen på austsida av Stordøya, og mellom permane er det òg aktuelle intervju med folk som var med då det skjedde.

Då Fitjarposten gav ut Fitjar Quiz av Magnar Kloster for to år sidan, «fauk» opplaget ut. No er Magnar Kloster på marknaden med Fitjar Quiz 2, og på søndag vil han både presentera boka og invitera til ein liten «quizkveld» med bokpremiar til vinnarlaget.

Fleire fitjarbuar har vore i Fitjarposten med spørsmål om me ikkje kunne laga ein eigen Fitjarkalender. Det har me gjort i år, og resultatet er Fitjarkalenderen 2011. Denne vil òg bli presentert på søndag.

Arrangørar er Fitjar Folkebibliotek i lag med Fitjarposten.