Dei siste åra har me hatt ein strålande fin peparkakeby i Fitjar vgs-regi i 2. høgda i Larsenbygget. – Mange var med i fjor, og i år vonar me endå fleire stiller med peparkake-kreasjonar, fortel Sissel Jørgensen.

– Me vil spesielt utfordra fitjarfirma til å markere seg på denne måten i år, seier Sissel Jørgensen, som allereie har utfordra Fitjar Kraftlag til å lage noko rundt vindmøllene.

– Me ser gjerne at det blir konkurranse mellom barnehagar, skuleklassar og bedrifter, smiler Jørgensen. Ho meiner òg at dette kan bli ein samlande og fin aktivitet for familiar. – Her kan ein lage mykje gøy i lag.

Peparkakebyen opnar 30. november, og folk kan koma med kreasjonane sine mellom klokka 11.00 og 15.00 om laurdagen og kl. 14.00 og 18.00 om søndagen. Siste sjanse til å levere inn er før kl. 12.00, laurdag 14.12. Då vert det premiering.

– Fitjar vgs lager til bord og pynt, så kan borna kome og pynte om dei vil, seier Sissel Jørgensen.

Når me var innom Fitjar vgs nyleg var dei òg i gang med teaterprosjektet sitt. Det skal dei ha generalprøve på førstkomande onsdag. Då er barnehagane i Fitjar invitert. Stykket er eit spennande eventyr der ei rekkje kjende eventyrfigurar er skrive inn.