Det går mot vår og o-løparane gler seg til å starta ein ny sesong ute i skogen. I helga vert det treningssamling på Fitjar.

Idrettsskulen for 2. og 3. klasse starta med orientering denne veka, og har det også på planen dei to neste tysdagen.

Denne helga arrangerer o-gruppa i Fitjar IL treningssamling. I tillegg til løparar frå Fitjar og Stord, kjem det også ein gjeng på besøk frå Odda. Samlinga startar med nattløp frå idrettsparken fredag kveld klokka 20. Det gamle kartet over Rossneset er dårleg, men Rolf-Atle Rolfsnes har starta arbeidet med å synfare og teikna nytt kart. Den ferdige delen skal brukast på nattløpet og på idrettsskulen dei to neste vekene.

Laurdag føremiddag klokka 10 joggar deltakarane frå Dalshaugane og oppover mot Orrhaugane for å trena, og om ettermiddagen er det ei ny økt med start frå parkeringa ved Dalshaugane. Denne økta blir òg tilrettelagt for nybyrjarar, og alle som har lyst å prøva seg er hjarteleg velkomen til å vera med klokka 15

På søndagen er det planlagt joggetur frå idrettsparken og oppover i Fitjarfjellet klokka 10.30.

O-gruppa planlegg òg familiedag i Rossneset søndag 22. mars med enkle postar og spørsmål langs turstien utover. Det blir òg grilling og aktivitetar ytterst i skogen. Helga etter skal Stord arrangera løp, og så går det slag i slag. Terminlista for Sunnhordland ligg på nettsidene til Stord IL: http://www.stordil.no/orientering/