Det var ikkje greitt å vera keeper Ruben Træet i dag, men her får han hjelp av Markus Gerhardsen. Foto: Kjetil Rydland.

A-laget til Fitjar møtte eit svært sterkt toarlag til seriekampen i Fitjar Idrettspark i dag, og Bjarg 2 vann så klart som 6-2, sjølv om Ruben Træet redda minst fem hundreprosentsjansar.

Utan ein Fitjar-keeper i toppslag kunne det ha sett frykteleg stygt ut etter kampen mot Bjarg 2 i dag. Ruben Træet redda to-tre hundreprosentsjansar i kvar omgang, og var den klart beste på eit elles bleikt Fitjar-lag.

Med det beste keeperspelet me har sett på lenge, heldt han nærmast åleine Fitjar inne i kampen i det lengste. Særleg var redninga etter ein halvtime spektakulær, han slo skotet frå kort hald opp i tverrliggjaren, og ballen spratt ut att på banen. Returen redda Ronny R. Bjellebø på streken!

Men med det flotte keeperspelet er det meste på plussida nemnt frå dagens kamp. Bjarg hadde fleire spelarar frå gårsdagens A-lagstropp på plass, og var langt sterkare i alle spelets fasar enn heimelaget. Og allereie etter fire minutt såg me kva veg det bar. Fitjar-forsvaret viste ikkje interesse for å klarera etter corner, og Lars Erik Løwø nytta høvet til å gi gjestene 1-0.

Daniel Skarpnes i kjent stil reduserer for Fitjar. Foto: Kjetil Rydland.

Gjestene heldt fram å dominera kampen, og var eit lite hakk betre enn Fitjar i alt. Dei arme Fitjar-spelarane er ikkje godt nok trente til å hamla opp med så gode fotballspelarar som dei møtte i dag. Rett nok greidde Marius Helland Storebø å redusera til 1-2 før pause, og Daniel Skarpnes til 2-4 midt i andre omgang. Men gjestene hadde dei fleste og største sjansane, og hadde det ikkje vore for det nemnde keeperspelet til Ruben Træet, hadde det ganske sikkert blitt tosifra nederlag i dag.

Etter tapet for Bjarg 2 var det fare for at Fitjar kunne hamna på nest sisteplass i årets 5. divisjon avd. 02, og rykkja ned til 6. divisjon. Men i kveld har dumpekandidat Juristforeningen tapt for Fana 2, og dermed kan dei ikkje gå forbi Fitjar, som no ikkje kan bli dårlegare enn tredje sist i puljen.

Etter det me forstår på gode lesarar av fotballtabellar, er då plassen i 5. divisjon for neste år sikra, sjølv om dei ikkje får poeng i siste kampen, mot Tornado Bergen neste helg. Vonleg vil me få sjå eit betre trent Fitjar i 5. divisjon til neste år.

Fitjar – Bjarg 2-6 (1-2)
Seriekamp 5. div. menn avd. 02
Fitjar Idrettspark
Søndag 20. oktober kl. 16.00
Publikum: 66
Dommar: Frode Wold, Lysekloster IL

- Annonse -

Mål: 0-1 Lars Erik Løwø (4), 0-2 August Birkeland (28.), 1-2 Marius Helland Storebø (40), 1-3 Hans-Fredrik Brosvik Holst (61), 1-3 Hans-Fredrik Brosvik Holst (70), 2-4 Daniel Skarpnes (72), 2-5 Enrique Crespo Søvik (75.) 2-6 Christopher Johannessen (87)

Gult kort: Ronny René Bjellebø (37) og Markus Gerhardsen (86), Fitjar; Martin Dregelid (48) og Henrik Røssevold Mildestveit (78), Bjarg 2.

Fitjar sitt lag mot Bjarg 2:
Ruben Træet, Markus Gerhardsen, Svein Arne Jordan Raunholm, Helge Myrmel Træet, Ronny René Bjellebø, Adrian Mehammer (Joakim Malkenes Fitjar 72.), Isak André Hansen Grov, Leif Tore Nesbø Aarland, Jonas Aleksandersen (Lars Fitjar Waage 46.), Marius Helland Storebø (Jan Åge Tislevoll 78.) og Daniel Skarpnes.