Ungar i alderen tre til 11 år fylte klubblokalet då Ole Vidar Helland baud på julebrus og bilsportfilm laurdag ettermiddag.

Ein del av barna til racerkjørarane i Fitjar Racing Team var for unge til å vera med på sesongavslutninga med pizza for eit par veker sidan. Men Ole Vidar Helland har auge for alle, og i går ettermiddag inviterte han alle ungane i bilsportmiljøet på brus, chips og kaker i klubblokalet. Også dei andre ungane i nabolagaet var inviterte, og 15 ungar i alderen tre til 11 år møtte opp.

Julebrusen gjekk ned på høgkant medan 11-åringen Ole Koløen Lønning viste bilete og film frå dei siste bilsportsesongane. Bileta gav dei unge del i spenninga og dramatikken som dei store opplever på billøp i Vikedal, Bergen og andre banar rundt om Noreg. Og skapte stort engasjement, til dei ikkje klarte å sitja i ro lenger, og måtte ut i den våte ettermiddagen og sparka fotball.