Ailin Vik, den første Fitjar-føraren og den første jenta som vinn vestlandsmeisterskapet i bilcross. Her saman med grunnleggjaren av Fitjar Racing Team, Ole Vidar Helland. Arkivfoto.

Under avslutninga av VM i bilcross og rallycross i Vikedal i dag har Fitjar Racing Team fått tre vestlandsmeistrar. Ailin Vik, Oiver André Matre og Håvard Helland gjekk alle til topps samanlagt i klassane sine.

Finalane i Vikedal er nettopp ferdige, og glade Fitjar-supporterar melder at Fitjar-førarane lukkast i å henta heim dei tre største pokalane.

Fitjar Racing Team har aldri før fått ein vestlandsmeister i bilcross, og det er derfor ein historisk dag når Ailin Vik går heilt til topps i juniorklassen. Dobbelt historisk er Ailin etter som ho er den første jenta som nokon gong går til topps i VM i bilcross.

Oliver André Matre gjorde det ikkje dårlegare, og blei den første Fitjar-føraren som har vunne seniorklassen i VM i bilcross. Og som om ikkje dette var nok, gjekk Håvard Helland heilt til toppr i rallycross, den største klassen, over 2400 ccm.

Me gratulerer dei tre vestlandsmeistrane med innsatsen, og ønskjer dei velkomne heim med dei store pokalane. Me kjem naturlegvis tilbake med referat frå den store, våte dagen i Vikedal.