Til helga går avslutningsrunden i årets vestlandsmeisterskap, og Fitjar Racing Team har sjansen til å vinna tre VM-titlar.

Den siste VM-runden går av stabelen førstkomande søndag, etter at det har vore «oppvarming» med parallellrace på laurdag. I søndagens avslutning har Fitjar Racing Team sjansen til å henta heim den største pokalen i heile tre klassar, nemleg bilcross junior og senior, og «verstingklassen» over 2400 ccm rallycross.

Ailin Vik – den første kvinnelege vestlandsmeisteren i bilcross?

I juniorklassen leiar Ailin Vik med fire poeng på Thomas Tofting frå NMK Bergen. Her har òg Jakob Hansen frå NMK Bergen ein viss sjanse til å vinna samanlagt. Men kampen kjem truleg til å stå mellom Ailin og Thomas Tofting.

Det er litt vanskeleg å spå, og å rekna ut kva som skal til for å vinna eller bli nummer to. Men dei to beste må nok vera på pallen søndag ettermiddag for å auka poengsummen sin samanlagt. Som kjent skal det strykast resultat før sluttrekneskapen blir gjort opp, så dette blir svært spennande!

Oliver André Matre leiar bilcross senior

Fitjar-føraren Oliver André kunne avgjort seniorklassen samanlagt med siger i Bergen siste helg. Men då vann klubbkameraten Sølve Østbø frå Ølen, føre nettopp vår mann, Oliver.

Dermed leiar Oliver med tre poeng på Marius Havre frå NMK Berge før avslutningsrunden i Vikedal. Her må Marius Havre vinna for å gå heilt til topps samanlagt. Dersom Oliver då tek andreplassen, vil dei ha like mange poeng, men Havre vil gå forbi på best resultat i finalen.

- Annonse -

Enkelt sagt er det nok slik at den som kjem først i mål av Oliver og konkurrenten frå Bergen, blir vestlandsmeister 2018. Og Oliver er godt førebudd – han veit kva som gjeld for å greie nokon ingen andre frå Fitjar Racing Team har greidd – å bli vestlandsmeister i bilcross.

Håvard Helland kan vinna den største klasse

I rallycross leiar Jan Kåre Frøyland frå Tysværvåg «verstingklassen», med motor over 2400 ccm etter siger i Bergen sist helg.

Men han bør nok vinna til helga om han vil behalda førsteplassen samanlagt. Fot også her har Fitjar ein mann med vinnarsjansar. Den gamle luringen Håvard Helland måtte stå over VM-runden i juni.

Derfor kan Håvard leggja til alle poenga han oppnår komande søndag, og er aldri så liten favoritt til å stikka av med samanlagtsigeren.

Stor og spanande dag for Fitjar Racing Team

Det lokale racingteamet vårt vil heilt sikkert setja sitt preg på avslutningsrunden i Vikedal, uansett kor mange VM-vinnarar som kjem heim søndag kveld.

I tillegg til dei tre VM-favorittane stiller Ole Lønning, Thea Vågen Matre og Joakim Strand på startstreken. Dei har ein flokk skarpskodde mekanikarar klare i depotet, og ca. 20 frivillige frå Fitjar er med på arrangementet. Blant desse er løpsleiar Sigurd André Maraas.

Dei som ikkje kjem seg av garde til Vikedal denne gongen, vil vera att i klubblokalet på Rydland. Her vil dei følgja med på VM-runden i rallycross i Riga på TV, og ta imot rapportar frå avslutninga av vestlandsmeisterskapet i Vikedal. Vonleg får dei mykje å jubla for søndag kveld.

Ringreven Håvard Helland kan stikka av med den største pokalen i den største klassen. Foto: FP-arkiv/KR.