Torhild Andersen og Tone Koløen kan allereie planleggja Fitjarfestivalen neste år etter at boden deira blei kåra til årets beste. Foto: Kjetil Rydland.

I føremiddag var det gudsteneste i teltet, og Fitjarfestivalen blei avslutta klokka 15 etter at det blei servert den lekraste festivalmiddag.

Søndag føremiddag var det tradisjonen tru festivalgudsteneste på kaien, med sokneprest Roald Drønen som forrettande prest.

Stemningsfull gudsteneste i teltet i dag. Foto: Kjetil Rydland.

Den flotte skipsklokka var på plass, og det same var musikantane Terje Træet, Heine Bernt Helland og «allestedsnærværende» Harald Rydland. Forsongar og solist Tom Rydland avslutta gudstenesta med «Over the Rainbow», som han song minst like fint som Judy Garland.

Stian Hatlevik t.h. nølte ikkje mykje før han begynte å rigga ned. Foto: Kjetil Rydland.

Straks siste middagsgjestene hadde svelgt siste biten av sausakjøtet, begynte nedrigginga. All ryddinga er nok ikkje ferdig enno, men me som slepp å vera med på den, kan sjå tilbake på minnerike dagar i sterkt varierande vêr på den nylagde asfalten. Om ein tar vêr og føreforhold i betraktning, må nok besøket under Fitjarfestivalen seiast å vera svært bra.

Me vil tru dei fleste kjem att til neste år, og vonleg vil fangstane i havet vera betre då. Om ikkje alle har høve til å koma tilbake, er me rimeleg sikre på å sjå igjen Torhild Andersen, Tone Koløen og Tor Gunnar Andersen. I skarp konkurranse med Fitjar Gardsmat blei nemleg Hogste Gardsmat sin bod utropt til den beste under årets festival. Dermed kan dei stilla opp gratis til neste år.

Her kjem eit par bildegalleri frå folkelivet under Fitjarfestivalen 2019.