F.v. Joakim Strand, Oliver A. Matre, Håvard Helland og Ole Lønning hadde ei god helg, sjølv om førstnemnde berre har ein gåen fordelar å visa til. Foto: Kjetil Rydland.

Fitjar-førarane Oliver A. Matre og Ailin Vik leverte god køyring i Bergen laurdag, og kjempar framleis i teten i vestlandsmeisterskapet i bilcross.

Som venta blei ingen ting avgjort i bilcross-VM samanlagt då nest siste runde blei avvikla på Eikåsbanen i Åsane i dag. Men Oliver André Matre var veldig nær samanlagtsigeren; han hadde blitt vestlandsmeister om han hadde vunne i dag.

I staden blei det andreplass på Oliver i dag, bak Sølve Østbø frå NMK Vikedal. Dermed ligg han på førsteplass føre siste runde, som går av stabelen i Vikedal søndag om ei veke. På andreplass ligg Marius Havre frå Bergen, som har kniva med Oliver heile sesongen. Han blei nummer tre i dag. Det er litt komplisert å rekna ut kva som skal til for å vinna, seier Oliver, etter som eitt løp kan strykast til slutt, men:

– Så vi eg kan sjå, vil den av oss to som kjem først i mål i Vikedal, bli vestlandsmeister!

I juniorklasse er Ailin Vik framleis i teten, etter femteplassen i Bergen i dag. Jakob Hansen frå NMK Bergen, som låg på andreplass bak Ailin før dagens løp, fekk motorhavari. Thomas Tofting, også han frå NMK Bergen, vann i dag, og kan vera den største trusselen for Ailin i kampen om den store pokalen.

Fitjar Racing Team har også sjansen på ein tredje stor pokal etter sesongavslutninga i Vikedal søndag 16. september. Håvard Helland blei nummer to i dag, og ligg på andreplass samanlagt i rallycross. Han har eitt løp færre enn konkurrentane, og MÅ ha eit resultat i Vikedal. Og det kan han få om han får bilen til å fungera litt betre; i dag hadde han litt tekniske problem.

– Men eit godt resultat i Vikedal kan bringa meg heilt til topps! smiler ein optimistisk Håvard Helland.

Resultat frå VM-runden på Eikåsbanen i Åsane i dag finn du på heimesida til NMK Bergen.

Oliver André Matre, med vesle Maia på fanget, konstaterer at han framleis er i førarsetet i vestlandsmeisterskapet samanlagt. Foto: Kjetil Rydland.