Ingve André Strand blei nummer 3 i NM-runden i crosskart i Solør, og klarte dermed 2.-plassen samanlagt etter svensken Lukas Walfridson.

Det er ein svært oppglødd Ingve André me har på tråden i ettermiddag etter ein god dag mot skarpskodde svenskar og nordmenn på Finnskogbanen i Solør. Etter to heatsigrar og ein tredjeplass i innleiande rundar blei det tredje beste startspor i fremste rekkje i dagens finale. Vinnar til slutt blei svensken Per Bjørnson, før samanlagtvinnaren Lukas Walfridson, og Ingve André på 3.-plass. Dermed blei fitjarguten beste nordmann både i dag og samanlagt i NM. Resultat frå dagens løp kan me lesa her:

Ingve André fortel til Fitjarposten at han er svært fornøgd med resultatet. No klarte han òg målsetjinga om å hevda seg i NEZ-cupen, Nord Europeisk Meisterskap i Crosskart. Dagens løp var nemleg nest siste runde i  NEZ. Her ligg han no på 2. plass og har vinnarsjansar samanlagt. Derfor vurderer han sterkt å reisa til Nysum i Danmark og den avsluttande runden i september. Men dette kjem an på sponsorane; han må ha litt støtte for å kunna reisa. Så no kan potensielle sponsorar venta seg besøk av pressetalsmann Sigurd André Maraas. – Dei som får besøk, veit kva det gjeld, fortel ein optimistisk pressetalsmann.

Også Anders Halleråker Strand har hatt ei god helg på banen i Solør, fortel faren Ingve André. Sjølv er guten godt fornøgd med 4.-plassen i C-finalen. Denne sesongen skulle han berre vera med for å læra, og det har han gjort, fortel faren.