For dei observante lesarane av riksavisa Vårt land var det nok fleire enn underteikna som reagerte på at det vart skrive at Fitjar kyrkje ligg i Bergen.

Avisa Vårt land hadde eit interessant fleire siders oppslag om vandreutstillinga ”Sennepsfrøet – Bibelen fortalt fra Kasakhstan”. Dette er ei vandreutstilling, i samband med lanseringa av den nye bibeloversettinga, med 56 bilete av den kasakhstanske kunstnaren Nelly Bube.

No har det seg slik at Fitjar har vore heldig, og er ein av fem stader i Noreg som får besøk av denne vandreutstillinga. I opplistinga av dei byane som får besøk av utstillinga står det: Bergen: Fitjar kirke og bedehus, 17.-26. februar. Det rette er at Fitjar kyrkje og Fitjar kultur- og idrettsbygg, i Fitjar kommune får besøk av vandreutstillinga 17.-24. februar.

Me i Fitjar kan gle oss over at utstillinga kjem til oss, og håpa at og mange frå Bergen tek turen over fjorden for å sjå ”fargesmykka” som avisa kallar dei vakre ikoninspirerte bileta til Nelly Bube.