Fitjarrussen, og barne – og ungdomslinja ved Fitjar Vidaregåande Skule, slo i kveld til med til med ein storstilt basar. Basaren var til inntekt for Barmhjertighetsbussen sitt arbeid for et barnehjem i Bobrinetz i Ukraina.  -Denne skal eg legga meg med, strålar 4 år gamle Karoline Vik. Ho har nettopp vunne ein mjuk og nydeleg kosehund, og syner han stolt fram for pappa, Ørjan Vik. 

Ho var ei av dei mange som  benka seg i kantina på Fitjar Vidaregåande Skule for å ta del i basaren som elevane arrangerte til inntekt for barneheimen, som dei  har samla inn pengar til fleire år på rad no.

Og dei har allereie sett at pengane har kome vel med. Mellom anna har ein gut med open gane, fått operasjon, og eit baderom på barnehjemmet som tidlegare ikkje såg ut i det heile, er no totalfornya med varmt og kaldt vatn, dusjar og vaskar. 

Inntektene frå basaren (mellom ti og femten tusen kroner) kjem i tillegg til inntektene frå russerevyen der elevane fekk inn 20 000 kroner på ein kveld. Elevane på barne- og ungdomslina får òg med seg 4000 kroner frå Fitjar kommune når dei no i april tek turen austover med Barmhjertighetsbussen, for å møte både borna og barneheimen.