I dag har jenter i 10-årsklassen okkupert idrettshallen i Fitjar og spela kampar frå klokka 12 til 17.

Eigentleg skulle det blitt avvikla åtte kampar, men tysnesingane dukka ikkje opp. Dermed blei det berre spela seks kampar, og Fitjar-jentene gjekk glipp av den siste kampen sin. Klubbane som møtte opp i tillegg til heimelaget Fitjar, var Kvinnherad, Stord og Odda.

I den første kampen i dag fekk me sjå heimelaget møta Kvinnherad. Etter godt keeperspel av Marion Træet heldt Fitjar godt følgje i første omgang, og gjekk til pause med 0-2. I andre omgang gjekk det litt tyngre, men laget viste både godt humør og fin disiplin. Mot eit lag som heilt tydeleg har spela meir handball blei det til slutt 2-8-tap. Etter kvart som jentene får meir trening i skrotten, vil dei nok bita betre frå seg.

Med von om ei god avslutning på dagen, møtte Fitjar-jentene opp til dagens siste kamp. Men gjestene frå Tysnes hadde ikkje funne vegen over Nuen. Dermed måtte skuffa jenter reisa heim att med uforretta sak.