Barnas turlag Stord/Fitjar var sist søndag på tur til Njoten med fokus på sopp.

– Me møtte klar til tur i lett tåke. Heile 38 hadde funne vegen denne flotte søndagen! Me hadde som mål undervegs å studere sopp. Allereie 100 meter frå start fann me ein heil soppskog! Her var det mykje spennande typar sopp me ville studere. Dei ulike sopptypane me fann plukka me med oss i korga. Me hadde hanskar på i tilfelle giftige soppar, skriv leiar Wenche Nygård i ei pressemelding.

– Halvvegs slapp tåka taket, og det vart godt og varmt. Her måtte me lette litt på kleda, skriv ho vidare, og fortset:

– Innover langs stien hang det bilete av 12 ulike soppar med namn. Nokon etande og nokon giftige. Me vart etter kvart ganske gode på å oppdage soppar som voks langs med stien.

På veg innover i lia var me ganske slitne, men me gav ikkje opp. Premien kom då me kom opp til varden og kunne nyte den flotte utsikta over Fitjar og Bømlo. Jammen var det flott her!

Då alle var komne opp, samla me oss og studerte dei soppane me hadde funne. Det var spennande å kjenne konsistensen på dei ulike (mat)soppane. Nokre soppar hadde skiver og nokre hadde røyr. Her var det mange soppar i ulike fargar, fasongar og konsistens.

Vegen ned gjekk på raske bein. Undervegs nedover fann me ein kjempesopp som var heile 25 cm i diameter! Fins det nokon større? Me drog heimover med gode minne frå ein flott tur i lag

Ingressbilete: Alle jublar for å ha nådd toppen.