Eit Fitjar-lag i scoringsform var fredag kveld i Bergen og kom heim med ein fullt fortent 5-2-siger over Eidsvåg.

Eidsvåg opna best, og etter 8 minutt tar laget leiinga; ein Fitjar-spelar gir ballen unødvendig frå seg langt nede på eigen banehalvdel, og innlegget frå høgre blir ekspedert på direkten bak Oddgeir Træet i Fitjar-målet.
Men det går ikkje mange minutta før det er balanse i rekneskapen igjen. Thomas V. Waage er sikker frå straffesparkmerket etter felling inne i Eidsvåg-feltet.

Etter 21 minutt gir Jan Åge Tislevoll Fitjar leiinga når han styrer inn frisparket frå Roger Almås. No er Fitjar-gutane skikkeleg i siget, dei dominerer banespelet, og ruller opp det eine angrepet etter det andre.
kvarteret før pause «opnar» gutespelar Henrik Raunholm Kjelling Eidsvåg-forsvaret når han sender Thomas V. Waage aleine igjennom med Eidsvåg sin siste skanse. Thomas runder keeper og legg på til 3-1. Få minutt etter er Thomas igjen frampå og set inn ein keeperretur, etter eit godt langskot frå Nils Ingard Tislevoll.

Med leiinga 4-1 til pause kontrollerer Fitjar-laget andre omgang, laget produserer store sjansar også i andre omgang, men utteljinga lar venta på seg. Brynjar Engelsen er fleire gonger farleg frampå, men det nærmaste han kjem er eit skot i tverrliggjaren. Etter 77 minutt reduserer Eidsvåg til 2-4 på eit kjempeskot frå 30 meter. Men miinuttet før slutt set Øystein Waage Fitjar inn 5-2 etter hjørnespark frå høgresida.

Fitjarlaget har dermed starta haustsesongen veldig godt, og mange av spelarane er no skikkeleg «på gang». Oddgeir Træet sto sikkert og godt i mål, på stopparplass var Jan Åge Tislevoll igjen solid. På midtbanen dominerte Roger Almås i lag med makker Kjell André Thorland, og på topp viste toppscorar Thomas V. Waage at scoringsappetitten frå i vår ikkje er borte.