A-laget til Fitjar har vore på Askøy og tapt 0-2 mot Follese laurdag ettermiddag.

Heimelaget Follese gjekk ut i hundre, og Fitjar-gutane kom på hælane. Allereie etter 7 minutt låg ballen i mål bak Aleksander Henriksen, i Fitjar-buret. Etter kvart kom Fijtar litt meir med, fortel trenar Kjell Træet. Men midt i den beste perioden til Fitjar gjekk Follese opp til 2-0. 

Etter pause satsa Fitjar alt på eit tidleg mål, men lukkast ikkje. Det nærmaste dei kom, var eit skot i stolpen frå Jan Åge Tislevoll. I tillegg hadde Fitjar tre-fire store målsjansar. Kjell Træet fortel at han følte heimelaget hadde bra kontroll, sjølv om gutane hans kom til mange sjansar.

– Dette er det beste laget me har møtt, med unnatak av Austevoll, seier Kjell, som er litt skuffa over at det ikkje ser ut til å lukkast på bortebane i år.      

– Det er nok ikkje tilfeldig at me ikkje har scora på bortebane enno, seier ein litt tvirådig Fitjar-trenar.

Ikkje uventa utropar Fitjar-trenaren Kjell André Thorland til bestemann på laget i dag. Som vanleg spela han ein kjempekamp på midtbanen. No ser både trenaren og laget fram til to heimekampar, den første allereie Kristi himmelfartsdag, mot Baune.

Etter dagens tap ligg Fitjar framleis eit godt stykke nede på tabellen i 4. divisjon, i ein pulje der alle ser ut til å slå alle. Når me ser bort frå naboane våre «nordom fjorden», som ser veldig kvasse ut etter 6-0 mot Bremnes på bortebane i dag.

Fitjar sitt lag mot Follese:
Aleksander Henriksen, Emil Fitjar (Tobjørn Korsvik 83.), Jan Åge Tislevoll, Nils Ingard Tislevoll, André Helland (Bernt-Ove Maraas 63.), Helge M. Træet, Kjell André Thorland, Øyvind Fykse Lie, Hernrik R. Kjelling (Goff Artsamai 56.), Badi Hurashi, Thomas V. Waage (Mats Brakedal 46.).