A-laget til Fitjar gjekk på sitt første tap i årets 5. divisjon, og måtte venda tomhendte heim frå Bergen søndag kveld, etter 1-2 mot Lyngbø 2.

Trenar Kjell Træet fortel til Fitjarposten at kampen blei den dårlegaste laget hans har spela så langt i serien i år. Rett nok styrte dei store delar av første omgang, men kom ikkje til mange sjansar. Dei to største sjansane i omgangen var det heimelaget som stod for. Fitjar var gjennom fleire gonger ved Thomas V. Waage, utan at det blei dei heilt store sjansane av det.

I andre omgang tok Lyngbø 2 meir og meir over i den uventa sommarvarmen. Fitjar-spelarane mangla sprut over heile linja. – Dei gjorde ikkje det me hadde snakka om på førehand, fortel Kjell Træet. I staden for å liggja kompakt når dei ikkje hadde ballen, blei det mykje strekk i laget. – Dermed blei det store rom å dekkja og mange vanskelege brudd imot oss, held Fitjar-trenaren fram.

Kjell Træet ergrar seg ekstra over at dei ikkje greidde å slå eit så ungt lag. Både forsvarsrekkja og keeper var juniorspelarar, seier han, og held fram: – Heile Fitjar-laget var under pari i dag, bortsett frå keeper Vidar Vestbøstad, som ikkje gjorde nokon feil.

Etter dagens tap må Fitjar sjå at Bremnes har gått forbi og toppar tabellen i 5. divisjon.