A-laget til Fitjar kom heim frå Sotra fredag kveld med 2-4-tap og null poeng etter møtet med Sund.

Dermed blinkar blålyset for Fitjar IL sin plass i 4. divisjon. Kveldens kamp blei øydelagt av 10 horrible minutt i byrjinga av andre omgang. Då gjekk heimelaget opp frå 0-1 til 4-1 på ein augneblink.

– Det var nesten ikkje til å tru, seier trenar Kjell Træet. – Me hang ikkje saman som eit lag, spelarane jobba for mykje kvar for seg.

Bortsett frå dei fatale 10 minuttane spela ikkje Fitjar ein direkte dårleg kamp. Dei gjekk opp til 1-0 etter vel eit kvarters spel ved Thomas Vestbøstad Waage.

– Me skapte mykje i første omgang, seier trenaren, og det kunne lett ha blitt fleire mål. Men Sund var betre i banespelet og hadde fleire store sjansar.

Etter at Fitjar hadde late Sund avgjera kampen, skjerpa dei seg litt, og avslutta kampen bra. Vel 10 minutt før slutt reduserte Badi Hurasi til 2-4. Men då var det for seint å ta igjen det tapte, og Fitjar måtte reisa tomhendte heim att.

Etter kveldens tap ser det skikkeleg spøkje ut for framtida i 4. divisjon, erkjenner trenar Kjell Træet. Det einaste håpet no er at Fitjar kjem seg forbi på tabellen, og at det berre rykkjer ned tre lag. Å få fleire lag bak seg er så godt som umogleg.

Best på Fitjar mot Sund var Kjell André Thorland, som etter trenaren sin meining spela ein veldig god kamp. Det same gjorde midtbanekollega Helge Træet. På plussida elles i kveldens var Nils Ingard Tislevoll, som spelte sin første heile kamp for sesongen.

KAMPFAKTA

Sund – Fitjar 4-2 (0-1)
Seriekamp 4. divisjon, menn
Fredag 4. september kl. 18.45
Hald stadion

Dommar: Bjørn-Ketil Olsen, TIL Hovding

Mål: 0-1 Thomas Vestbøstad Waage (17), 1-1 (47), 2-1 (49), 3-1 (55), 4-1 (56), 4-2 Badu Hurasi (79)

Laget til Fitjar: Aleksander Henriksen, André Helland (Thomas Koløen 74), Nils Ingard Tislevoll, Emil Fitjar, Sander Tverborgvik (Frode Malkenes 59), Helge Træet, Kjell André Thorland, Torbjørn Korsvik, Badi Hurasi, Mats Brakedal (Sebastian T. Thomassen 54), Thomas Vestbøstad Waage (Mats Westvik 68).