Fitjar opna årets sesong med å ta eitt poeng mot Fusa heime på kunstgraset laurdag ettermiddag. Heimelaget opna og best, men etter kvart kom Fusa meir med, og tok leiinga etter eit hjørnespark som blei heada inn bak Oddgeir Træet i Fitjar-buret.

Fitjar kjem aldri i gang med pasningsspelet sitt i første omgang, presisjonen er for dårleg og rørsla i laget er ikkje god nok.

Når så Fusa legg på til 2-0 på ein fin enkeltmannsprestasjon, ser det mørkt ut for Fitjar-gutane.

Andre omgang startar med eit mykje meir aggressivt Fitjar-lag, pasningsspelet sit bedre og laget skaper farlege sjansar på raske overgangar.

Først er det Kjell André Thorland som er våken frampå og puttar inn ein retur etter eit skudd frå Thomas V. Waage, og redusering til 1-2.

Deretter går Fitjar nesten direkte frå avspark og utliknar til 2-2. Brynjar T. Engelsen legg inn frå høgresida, ballen blir klarert ut på 16 meter til ein fremadstormande Leif Tore Aarland, som klinker ballen i mål på direkten.

Etter dette ligg kampen og «vippar», begge lag er farleg frampå. Thomas V. Wagge scorar på slutten på eit skudd frå 16-17 meter, eit mål som blir annullert. Alt i alt skal ein vera bra fornøgd med eitt poeng når ein kjem under med to mål, Fusa var eit bra lag som nok kjem til og vera med og kjempa blant dei beste laga i avdelinga.

A-lagstrenar Stein Gunnar Halleråker seier seg spesielt nøgd med midtbanetrioen i dagens kamp.

– Kjell André Thorland, Kjell Træet og Leif Tore Aarland spelte alle ein god kamp og var sterkt medvirkande til snuoperasjonen i andre omgang, seier Stein Gunnar til fitjarposten.no.