Tord Harald Skår med fire mål mot Fitjar. Foto: FP-arkiv/KR.

Torsdag kveld hadde Fitjar sitt A-lag besøk av serieleiar Austevoll, og som venta blei gjestene altfor sterke og tok med seg tre poeng over Selbjørnsfjorden etter 7-2 over hardt kjempande fitjargutar.

Austevoll har gått frå siger til siger i årets 5. divisjon, medan Fitjar kjempar på nedre halvdel av tabellen. Ikkje uventa var det derfor klasseforskjell på laga då AIK gjesta fitjargraset torsdag kveld.

Fitjar forsvarte seg godt, men ei uheldig opning øydela kampen for dei brave gutane til Jan Åge Tislevoll. Allereie før fem minutt var passert, scora den gamle storscoraren Tord Harald Skår for Austevoll, og få minutt etter stod det 0-2 etter at keeper Ruben Træet var uheldig på ein corner.

Dermed hadde ikkje Fitjar fått den opninga dei hadde bruk for mot det beste laget i divisjonen. Og før halvtimen var passert hadde Tord Harald Skår scora to gonger til. Ved pause stod det 0-5, etter at Christian Haugland Mikkelsen òg hadde notert seg på scoringslista.

Ti minutt ut i andre omgang reduserte Fitjar-kaptein Leif Tore Aarland til 1-5. Det første A-lagsmålet hans på mange år var av det fine slaget, ei fin heading på eit endå finare frispark frå Kristian Træet. Men eit kvarter før slutt var målmaskinane Tord Harald Skår og Kristoffer Østervold frampå med kvar si scoring i løpet av eit minutt.

Dermed nytta det lite at unge Joakim Malkenes fekk gleda av å scora sitt aller første A-lagsmålet heilt på slutten. Men avgjort eit lyspunkt på ein veldig tøff dag for Fitjar sine beste menn.

Heile laget kjempa godt, men det var klasseforskjell på laga. Austevollingane er framleis like klåre opprykksfavorittar som dei har vore, og kunne lett ha notert tosifra mot Fitjar. Men heimelaget skal ha ros for at dei gjorde det dei kunne for å begrensa nederlaget.

Tabellen i 5. divisjon avd. 02 ser framleis ikkje altfor ille ut, men Fitjar bør ha poeng mot Fana 2 heime neste fredag.

Fitjar – Austevoll 2-7 (0-5)
Seriekamp 5. div. menn avd. 02
Fitjar Idrettspark
Torsdag 29. august kl. 18.30

Mål: 0-1 Tord Harald Skår (5.), 0-2 sjølvmål (8.), 0-3 Tord Harald Skår (16.), 0-4 Tord Harald Skår (30.), 0-5 Christian Haugland Mikkelsen (43.), 1-5 Leif Tore Nesbø Aarland (56.), 1-6 Kristoffer Østervold (75.), 1-7 Tord Harald Skår (76.), 2-7 Joakim Malkenes Fitjar (90.).

Dommar: Bjørn-Ketil Olsen, Tertnes Fotball

Fitjar sitt lag mot Austevoll:
Ruben Træet (Elias Westerheim 81.), Jonas Aleksandersen (Jacob Myhre 20.), Helge Myrmel Træet, Leif Tore Aarland, Svein Arne Jordan Raunholm, Isak André Hanssen Grov, Kristian Træet, Øyvind Fluge Rydland (Ronny René Bjellebø 46.), Daniel Skarpnes (Joakim Malkenes Fitjar 46.), Nabeel Amir Makabi Zeynalabedri (Sondre Fitjar 81.) og Marius Helland Storebø (Thomas Vestbøstad Waage 88.).

Leif Tore Aarland fekk ein tøff dag mot Austevoll, men noterte seg for sitt første A-lagsmål på mange år. Foto: FP-arkiv/KR.