Daniel Skarpnes med hat trick mot botnlaget Vaksdal. Foto: FP-arkiv / Kjetil Rydland.

A-laget til Fitjar sikra seg eit lite pusterom i botnen av 5. divisjon då dei slo nedrykksrival Vaksdal 4-1 på heimebane laurdag ettermiddag.

A-laget reiste seg etter det famøse 1-9-nederlaget i førre serierunde då dei banka Vaksdal på Fitjar-graset i dag. Gjestene ser dermed ut til å gå mot nedrykk, medan Fitjar heng brukbart med dei andre laga på nedre halvdel av tabellen.

Kampen starta på den best tenkelege måten for Fitjar i dag. Allerie etter tre minutt stod det 2-0 etter to scoringar av Daniel Skarpnes. Og på overtid i første omgang fullførte han eit ekte hat trick, slik at Fitjar kunne gå til pause med komfortable 3-0.

Fitjar hadde bra kontroll i andre omgang, sjølv om Vaksdal reduserte til 3-1 midt i omgangen. Rundt eit kvarter før slutt avgjorde innbytar Jacob Myhre kampen med si første sscoring for A-laget til Fitjar.

Med 4-1 i dag ser tabellen for 5. divisjon avd. 02 noko betre ut for Fitjar sin del. Vaksdal er rista av, og med minst uavgjort mot Juristforeningen neste helg bør plassen i divisjonen vera berga. Men kampen skal spelast først …

– Det var bra innsats over heile linja i dag, seier ein letta Fitjar-trenar, Jan Åge Tislevoll, som ser lysare på serieavslutninga i dag enn førre helg.

Fitjar – Vaksdal 4-1 (3-0)
Seriekamp 5. div. menn avd. 02
Fitjar Idrettspark
Laurdag 5. oktober kl. 13.00
Dommar: Tommy Jacobsen, Bergen Nord

Mål:  1-0 Daniel Skarpnes (1.), 2-0 Daniel Skarpnes (3.), 3-0 Daniel Skarpnes (45.), 3-1 (67.), 4-1 Jacob Myhre (75.).

Gult kort: Helge M. Træet.

Fitjar sitt lag mot Vaksdal:
Ruben Træet, Jonas Aleksandersen, Svein Arne Jordan Raunholm, Helge Myrmel Træet, Markus Gerhardsen, Joakim Malkenes Fitjar (Jan Åge Tislevoll 70.), Leif Tore Nesbø Aarland, Isak André Hansen Grov, Adrian Mehammer (Sondre Fitjar 80.), Marius Helland Storebø (Jacob Myhre 65.) og Daniel Skarpnes.